News 2012

ວິທະຍາໄລຄູຫຼວງພະບາງຍົກລະດັບທິດສະດີການເມືອງ-ການປົກຄອງ ໄລຍະ 45 ວັນໃຫ້ພະນັກງານພາຍໃນສະຖາບັນ

ໃນວັນທີ່ 20 ກຸມ​ພາ 2017 ຢູ່ວິ​ທະ​ຍາ​ໄລ​ຄູຫຼວງພະບາງໄດ້ຈັດພິທີເປີດຊຸດອົບຮົມທິດສະດີການເມືອງ -ການປົກຄອງ 45 ວັນ ໃຫ້ແກ່ພະນັກງານວິ​ທະ​ຍາ​ໄລ​ຄູຫຼວງພະບາງ, ໂດຍການເຂົ້າຮ່ວມເປັນ​ປະ​ທານຂອງທ່ານ ​ຄຳຫຼ້າ ລຽນ​ປະ​ດິດ ຄະ​ນະ​ປະ​ຈຳ​ພັກ​ແຂວງ ຫົວ​ໜ້າ​ໂຄ​ສະ​ນາ​ອົບ​ຮົມ​ແຂວງ ສະ​ມາ​ຊິກ​ສະ​ພາ​ແຫ່ງ​ຊາດ,ທ່ານ ​ຊາຍ​ສະ​ຫວັນ ຈັນ​ມາ​ນິດ ຮອງ​ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາແຂວງຫຼວງພະບາງ,​ມີຄະນະຈັດຕັ້ງແຂວງ, ຂະແໜງການອ້ອມຂ້າງພະແນກ ແລະ ຄູ-ອາຈານ, ແຂກຖືກເຊີນ ພ້ອມດ້ວຍສຳມະນາກອນເຂົ້າຮ່ວມ.

ຕໍ່​ກອງ​ປະ​ຊຸມ​ດັ່ງ​ກ່າວ ທ່ານ ບຸນ​ສຸ​ວັນ ລັດ​ຕະ​ນາ ຜູ້​ອຳ​ນວຍ​ການ​ວິ​ທະ​ຍາ​ໄລ​ຄູຫຼວງ​ພະ​ບ​າງ ໄດ້ຂື້ນຜ່ານແຜນ​ການ​ຈັດ​ຕັ້ງ​ເຝີກ​ອົບ​ຮົມ​ໂດຍ​ຫ​ຍໍ້ແລະການ​ຈັດ​ຕັ້ງ​ປະ​ຕິ​ບັດ​ການ​ຮຽນ-ການ​ສອນ​ເປັນ​ຕົ້ນ.​ການຈັດຊຸດອົບຮົມນີ້ແມ່ນເພື່ອຍົກລະດັບຄວາມຮູ້ພື້ນຖານດ້ານທິດສະດີການເມືອງ ແລະ ການປົກຄອງເປັນຕົ້ນແມ່ນຫຼັກມູນພື້ນຖານທິດສະດີມາກ-ເລນິນ, ແນວທາງນະໂຍບາຍຂອງພັກ, ປັບປຸງ, ຍົກລະດັບດ້ານແນວຄິດການເມືອງ, ຫຼັກໝັ້ນ ແລະ ທັດສະນະຊົນຊັ້ນກຳມະກອນ, ຮູ້ຈຳແນກໄດ້ມິດ-ສັດຕູ, ກຽມພ້ອມຮັບໃຊ້ຊາດ ແລະ ປະຊາຊົນ, ເຊື່ອໝັ້ນຕໍ່ການນຳພາຂອງພັກກໍ່ຄືຈຸດໝາຍການພັດທະນາປະເທດ, ເພື່ອນຳໄປຜັນຂະ ຫຍາຍໃນຂົງເຂດວຽກງານຕົວຈິງໃຫ້ເກີດຜົນ ແລະ ພັດທະນາທ້ອງຖີ່ນຂອງຕົນເອງໃຫ້ຈະເລີນໃນຕໍ່ໜ້າ.ສຳລັບຫຼັກສູດທິດສະດີການເມືອງການປົກຄອງໄລຍະສັ້ນ 45 ວັນ, ການຝຶກອົບຮົມຄັ້ງນີ້ມີສຳມະນາກອນທັງໝົດ 65 ທ່ານ,ຍິງ 27 ທ່ານທີ່​ມາ​ຈາກ 6 ພະ​ແນກ​ການ​ເຊັ່ນ ວິ​ທະ​ຍາ​ໄລ​ຄູຫຼວງ​ພະ​ບາງ, ທະ​ນາ​ຄານ​ນະ​ໂຍ​ບາຍ, ສານ​ປະ​ຊາ​ຊົນ​ແຂວງ, ສະ​ຖາ​ບັນ​ຍຸດ​ຕິ​ທຳ​ພາກ​ເໜືອ, ບໍ​ລິ​ສັດ​ລາວ​ໂທ​ລະ​ຄົມ ແລະ ໄປ​ສະ​ນີ​ລາວ, ປະກອບມີ 5 ກຸ່ມວິຊາຮຽນ, 39 ບົດ,ມີ 315 ຊົ່ວໂມງ,ໃນນີ້ມີ: ວິຊາປັດສະຍາ ມີ 8 ບົດ, 42 ຊົ່ວ​ໂມງ,ວິຊາເສດຖະສາດການເມືອງ ມີ 10 ບົດ, 77 ຊົ່ວ​ໂມງ, ວິ​ຊາລັດທິສັງຄົມນິຍົມວິທະຍາສາດ ມີ 8 ບົດ, 70 ຊົ່ວ​ໂມງ, ວິຊາບໍລິຫານສາດ ມີ 8 ບົດ, 77 ຊົ່ວ​ໂມງ ແລະ ວິຊາກໍ່ສ້າງພັກ ມີ 5 ບົດ, 35 ຊົ່ວ​ໂມງ.ເຊິ່ງສຳມະນາກອນຈະໄດ້ຮັບຟັງກາບັນລະຍາຍ,ການສຳມະນາ,ແກ້ຂໍ້ຂ້ອງໃຈ,ໄປທັດສະນະ,ການສະຫຼຸບ​ຜົນແລະຮັບໃບຢັ້ງຢືນ.
ໂອກາດນີ້ທ່ານ ຄຳຫຼ້າ ລຽນ​ປະ​ດິດ ໄດ້ມີຄຳເຫັນໂອ້ລົມເຊິ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມ​ເຊີຍຜົນງານການຝຶກອົບຮົມຂອງໂຮງຮຽນການເມືອງການປົກຄອງທີ່ຜ່ານມາພ້ອມທັງເໜັ້ນບາງບັນຫາທີ່ຈະສືບຕໍ່ປະຕິບັດເປັນຕົ້ນແມ່ນດ້ານການຈັດຕັ້ງປະຕິບັດການຮຽນ ແລະ ການສອນໃຫ້ສຳມະນາກອນໃນຊຸດອົບຮົມຄັ້ງນີ້ປະສົບຜົນສຳເລັດ, ພ້ອມທັງເໜັ້ນໃຫ້ສຳມະນາກອນທຸກຄົນຈົ່ງຕັ້ງໜ້າເຂົ້າໃນການສຶກສາຮ່ຳຮຽນເອົາຄວາມຮູ້ຄວາມສາມາດ ແລະ ສິນທຳປະຕິວັດ,ເຊີ່ງຊຸດອົບຮົມຄັ້ງນີ້ແມ່ນມີຄວາມໝາຍຄວາມສຳຄັນ ເປັນການຍົກລະດັບທິດສະດີໃຫ້ແກ່ສະມາຊິກພັກ,ການນຳຂັ້ນຮາກຖານ,ທ້ອງຖີ່ນໂດຍສະເພາະແມ່ນພະນັກງານພາຍໃນວິ​ທະ​ຍາ​ໄລ​ຄູຫຼວງພະບາງ ໄດ້ຮູ້ທິດທາງ,ແນວທາງນະໂຍບາຍຂອງພັກ ແລະ ແຜນພັດທະນາຂອງລັດ ເພື່ອເອົາໄປພັດທະນາຕົນເອງ ແລະ ສືບຕໍ່ວຽກງານຂອງຕົນໃຫ້ເຂັ້ມແຂງຮອບດ້ານໃນຕໍ່ໜ້າ.

ທ້າຍກອງ​ປະ​ຊຸມ​ດັ່ງ​ກ່າວ ທ່ານ ຫຸມ​ພັນ ຄອນ​ສະ​ຫວັດ ຮອງ​ຜູ້​ອຳ​ນວຍ​ການ​ວິ​ທະ​ຍາ​ໄລ​ຄູຫຼວງ​ພະ​ບາງ ໄດ້​ຂື້ນ​ຮັບ​ເອົາ​ຄຳ​ຄິດ​ຄຳ​ເຫັນ​ຂອງ​ປະ​ທານ ເພື່ອ​ນຳ​ໄປ​ຈັດ​ຕັ້ງ, ອອກ​ແຮງ ແລະ ສະ​ຕິ​ປັນ​ຍາ​ຄົ້ນ​ຄວ້າ​ຮ່ຳ​ຮຽນ ເພື່ອ​ນຳ​ເອົາ​ຄວາມ​ຮູ້​ທີ່​ໄດ້​ມາ​ໃນ​ຄັ້ງ​ນີ້​ໄປ​ຜັນ​ຂະ​ຫ​ຍາຍ​ຕໍ່​ສະ​ມາ​ຊິກ​ພັກ​ພາຍ​ໃນ​ຂະ​ແໜງ​ການ​ຂອງ​ຕົນ​ໃຫ້​ ແລະ ເພື່ອ​ສ້າງ​ໜ່ວຍ​ພັກ​ໃຫ້​ກາຍ​ເປັນ​ຫ​ນ່ວຍ​ພັກ​ເຂັ້ມ​ແຂງ ຮູ້​ນຳ​ພາ​ຮອບ​ດ້ານ.

ພາບ ແລະ ຂ່າວ: ປະ​ນົມ​ພອນ ຄອນ​ສະ​ຫວັດ