News 2012

ການສະເຫຼີມສະຫຼອງວັນຝຣັງໂກໂຟນີສາກົນທີ່ວິທະຍາໄລຄູຫຼວງພະບາງ

ໃນຕອນບ່າຍຂອງວັນທີ 17 ມີນາ 2017 ກະຊວງການຕ່າງປະເທດ ໂດຍຮ່ວມກັບພາກສ່ວນທີ່ກ່ຽວຂ້ອງໄດ້ຈັດພິທີສະເຫຼີມສະຫຼອງວັນຝຣັງໂກໂຟນີສາກົນຂຶ້ນຢ່າງເປັນທາງການ ທີ່ຫ້ອງປະຊຸມໃຫ່ຍຂອງວິທະຍາໄລຄູຫຼຼວງພະ​ບາງ. ເປັນກຽດໃນ​​​ພິທີ​ດັ່ງກ່າວ ​ມີ ທ່ານ ບຸນເກີດ  ສັງສົມສັກ, ລັດຖະມົນຕີປະຈຳ​ຫ້ອງ​ວ່າການ​ສຳນັກງານ​ນາຍົກລັດຖະມົນຕີ, ຜູ້ຮັບຜິດຊອບວຽກງານຝຣັງໂກໂຟນີ, ທ່ານ ຄຳ​ຂັນ ຈັນທະ​ວີ​ສຸກ, ເຈົ້າ​ແຂວງ ​ແຂວງ​ຫຼວງ​ພະ​ບາງ ພ້ອມດ້ວຍການນຳຂອງແຂວງຫຼວງພະບາງຈຳນວນໜຶ່ງ ​ແລະ ທ່ານ ນາງ ໂກຼດິນ ເລີດູ, ເອກອັກຄະລັດຖະທູດຝຣັ່ງ ປະຈຳ ສປປ ລາວ ພ້ອມກັບບັນດາທູຕານຸທູດຂອງປະເທດທີ່​ໃຊ້​ພາສາ​ຝຣັ່ງ; ທ່ານ ຫົວໜ້າຫ້ອງການມະຫາວິທະຍາໄລ ຝຣັງໂກໂຟນີ (AUF) ປະຈໍາ ສປປ ລາວ; ບັນດາຄູອາຈານ ແລະ ນັກຮຽນ-ນັກສຶກສາທີ່ຮຽນພາສາຝຣັ່ງ ພາຍໃນແຂວງຫຼວງ​ພະ​ບາງ ເຂົ້າຮ່ວມ ຈຳນວນ 250 ກວ່າທ່ານ.

ໃນການກ່າວຄຳປາໃສໃນພິທີດັ່ງກ່າວ, ທ່ານ ບຸນ​ເກີດ ສັງ​ສົມ​ສັກ, ລັດຖະມົນຕີປະຈໍາຫ້ອງວ່າການສໍານັກງານນາຍົກລັດຖະມົນຕີ,ຮັບຜິດຊອບວຽກງານຝຣັງໂກໂຟນີ, ​ໄດ້ຍົກໃຫ້ເຫັນຄວາມໝາຍສຳຄັນຂອງວັນຝຣັງ​ໂກ​ໂຟນີສາກົນ, ການສົ່ງ​ເສີມ​ການພົວພັນຮ່ວມມືລະຫວ່າງອົງການຝຣັງໂກໂຟນີສາກົນ (OIF) ແລະ ສປປ ລາວ, ການພົວພັນຮ່ວມມື​ແບບສອງຝ່າຍລະຫວ່າງ ລາວ – ຝຣັ່ງ ໃນຂອບວຽກ ຝຣັງໂກໂຟນີ ​ໂດຍ​ສະ​ເພາະການສົ່ງເສີມການຮຽນ-ການສອນພາສາຝຣັ່ງ ຢູ່ ສປປ ລາວ, ລວມທັງ​ການ​ສົ່ງ​ເສີມ​ກາ​ນຮ່ວມມື​ດ້ານ​ເສດຖະກິດໃນຂົງເຂດຝຣັງໂກໂຟນີ. ຢູ່ໃນການກ່າວປາໃສໃນພິທີ, ທ່ານ ເອກອັກຄະລັດຖະທູດຝຣັ່ງ ປະຈຳ ສປປ ລາວ ກໍ່ໄດ້​ເນັ້ນຄວາມສຳຄັນ​ຂອງ​ວັນ​ຝຣັງ​ໂກ​ໂຟນີສາກົນ ຊຶ່ງ​ເປັນ​ການ​ແນ​ໃສ່ສົ່ງ​ເສີມ​ການ​ຮ່ວມ​ມື​ໃນ​ຂອບວຽກ​ຂອງ​ອົງ​ການ OIF, ​ຍົກ​​ໃຫ້​ເຫັນການ​ນຳໃຊ້ພາສາຝຣັ່ງ​ໃນ​ເວທີ​ສາກົນ ​ແລະ ​ການ​ຮ່ວມ​ມືດ້ານ​ພາສາ​ຝຣັ່ງ ຢູ່ ສປປ ລາວ. ໃນພິທີດັ່ງກ່າວ ຍັງໄດ້ມີການອ່ານສານຂອງເລຂາທິການໃຫ່ຍຂອງອົງການ OIF, ກ່ຽວກັບການສະເຫຼີມສະຫຼອງວັນດັ່ງກ່າວ ສຳລັບປີ 2017 ຕິດຕາມດ້ວຍການກ່າວຄໍາເຫັນຂອງ ທ່ານ    ຜູ້ອຳ​ນວຍ​ການວິທະຍາໄລຄູ ຫຼວງ​ພະ​ບາງ ໃນໂອກາດດັ່ງກ່າວ, ​ໂດຍ​ໄດ້​ຍົກ​ໃຫ້​ເຫັນ​ເຖິງ​ຜົນງານ​ການ​ເຄື່ອນ​ໄຫວ​​ ​ແລະ ການ​ຮ່ວມ​ມືໃນ​ຂອບ​ວຽກຝຣັງ​ໂກ​ໂຟນີ​. ຫຼັງຈາກນັ້ນ, ບັນດາຜູ້ເຂົ້າຮ່ວມ ໄດ້ຊົມການສະແດງສິນລະປະວັນນະຄະດີຂອງນ້ອງນັກຮຽນ-ນັກສຶກສາພາສາຝຣັ່ງ ແລະ ການວາງສະແດງຮູບພາບກ່ຽວກັບການເຄື່ອນໄຫວວຽກງານຂອງບັນດາຄູອາຈານ ແລະ ນັກຮຽນ-ນັກສຶກສາແຂວງຫຼວງ​ພະ​ບາງ. ພິທີທາງການສະເຫຼີມສະຫຼອງວັນດັ່ງກ່າວ ໄດ້ດຳເນີນໄປໃນບັນຍາ ກາດອັນດີ ແລະ ປິດລົງດ້ວຍຜົນສຳເລັດຢ່າງຈົບງາມ.

ອົງການຝຣັງໂກໂຟນີສາກົນ ແມ່ນເປັນອົງການຈັດຕັ້ງລະຫວ່າງ​ລັດຖະບານ​ຂອງບັນດາປະເທດທີ່ໃຊ້ພາສາຝຣັ່ງ ຊຶ່ງໄດ້ຮັບການສ້າງຕັ້ງຂຶ້ນ ໃນວັນທີ 20 ມີນາ 1970, ໂດຍມີຈຸດປະສົງ​ແນ​ໃສ່ເພື່ອເສີມສ້າງຄວາມສາມັກຄີ, ການຮ່ວມມື, ການປົກປ້ອງຄວາມຫຼາກຫຼາຍທາງດ້ານວັດທະນະທໍາ ​ແລະ ການ​ສົ່ງ​ເສີມ​ພາສາ​ຝຣັ່ງ. ປັດຈຸບັນ, ອົງການດັ່ງກ່າວ ມີສະມາຊິກທັງໝົດ 84 ປະເທດ ໃນນັ້ນມີ 58 ປະເທດທີ່ເປັນສະມາຊິກສົມບູນ ແລະ 26 ປະເທດສັງເກດການ. ສປປ ລາວ ໄດ້ເຂົ້າເປັນສະມາຊິກສົມບູນຂອງອົງການດັ່ງກ່າວ ໃນວັນທີ 20/11/1991. ນັບ​ແຕ່​ປີດັ່ງກ່າວ​ນີ້, ອົງການ OIF ໄດ້ໃຫ້ການຮ່ວມມື ແລະ ການຊ່ວຍເຫຼືອແກ່ ສປປ ລາວ ໃນຫຼາຍໆດ້ານ ໂດຍສະເພາະ​​ການ​ສົ່ງ​ເສີມ​ກາ​ນຮຽນ-ການ​ສອນ​ພາສາ​ຝຣັ່ງ ​​ແລະ ການສ້າງ​ຂີດຄວາມສາມາດ ໃນຂະແໜງການສຶກສາ, ສາທາລະນະສຸກ ແລະ ວັດທະນະທຳ.

ໃນຖານະທີ່ເປັນສະມາຊິກຂອງອົງການ, ສປປ ລາວ ໄດ້ປະກອບສ່ວນຢ່າງ​ຕັ້ງໜ້າ​ເຂົ້າ​ໃນວຽກງານການ​ນໍາ​ໃຊ້​ພາສາ​ຝຣັ່ງ​ໃນ​​ເວທີ​ສາກົນ; ການ​ສົ່ງ​ເສີມ​ການ​ຮຽນ-ການ​ສອນ​ພາສາຝຣັ່ງ, ການ​ເຂົ້າ​ຮ່ວມ​ກອງ​ປະຊຸມ​​ຕ່າງໆຂອງ​ອົງການ OIF, ລວມທັງ​ກິດຈະກຳຊຸກຍູ້​ການ​ນໍາ​ໃຊ້​ພາສາ​ຝຣັ່ງ. ສປປ ລາວ ກໍ່ຄືບັນດາປະເທດສະມາຊິກ OIF ​ເຫັນ​ໄດ້​ເຖິງ​ຄວາມ​ສຳຄັນ​ຂອງ​ວັນ​ຝຣັງ​ໂກ​ໂຟນີສາກົນ, ຈຶ່ງໄດ້ຈັດໃຫ້ມີພິທີທາງການ ແລະ ກິດຈະກຳ ເພື່ອສະເຫຼີມ ສະຫຼອງວັນດັ່ງກ່າວ ໃນໄລຍະເດືອນມີນາຂອງທຸກໆປີ, ແນໃສ່ເພື່ອສົ່ງເສີມວຽກງານຝຣັງໂກໂຟນີ.