ກອງປະຊຸມປະຈໍາສົກຮຽນ 2020-2021
ຂອງວິທະຍາໄລຄູຫຼວງພະບາງ

ຕອນເຊົ້າຂອງວັນທີ 15 ທັນວາ 2021 ທີ່ຫ້ອງປະຊຸມຕຶກ 3 ຊັ້ນວິທະຍາໄລຄູຫຼວງພະບາງ ໄດ້ມີກອງປະຊຸມປະຈໍາສົກຮຽນ 2020-2021 ຂອງວິທະຍາໄລຄູຫຼວງພະບາງ ຄັ້ງວັນທີ 15-17 ທັນວາ 2021. ກອງປະຊຸມເປີດຂຶ້ນຢ່າງເປັນທາງການ ໂດຍການເປັນປະທານຂອງ ທ່ານ ປທ ຫຸມພັນຄອນສະຫວັດ ຜູ້ອຳນວຍການວິທະຍາໄລຄູຫຼວງພະບາງ, ມີຮອງອຳນວຍການ, ຫົວໜ້າຫ້ອງການ, ຫົວໜ້າໂຮງຮຽນມັດທະຍົມສາທິດ ຫົວໜ້າໝວດໂຮງຮຽນປະຖົມສາທິດ, ຮອງຫົວໜ້າຫ້ອງການ ແລະ ຜູ້ຕາງໜ້າ 3 ອົງການຈັດຕັ້ງເຂົ້າຮ່ວມຢ່າງພ້ອມພຽງ. ກອງປະຊຸມຄັ້ງນີ້ ທ່ານ ຫຸມພັນ ຄອນສະຫວັດ ຜູ້ອຳນວຍການວິທະຍາໄລຄູຫຼວງພະບາງໄດ້ເຊື່ອມຊືມເອກະສານວັນຍຶດອຳນາດ 23 ສິງຫາ ຄົບຮອບ 76 ປີ, ເອກະສານປາຖະກະຖາວັນຊາດທີ 2 ທັນວາ ຄົບຮອບ 46 ປີ ແລະ ເອກະສານມູນເຊື້ອວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 101 ປີ. ເອກະສານຜົນສໍາເລັດໂຄງການກໍ່ສ້າງທາງລົດໄຟລາວ-ຈີນ, ລາຍງານສະພາບການຈັດຕັ້ງປະຕິບັດວຽກງານປະກັນຄຸນນະພາບພາຍໃນ QA ແລະ ວຽກງານ COD/COE ໂດຍ ທ່ານ ສອນເພັດ ສີສະອາດ ຄະນະອຳນວຍການວິທະຍາໄລຄູຫຼວງພະບາງ. ກອງປະຊຸມຄັ້ງນີ້ ໄດ້ມີພິທີມອບ-ຮັບ ຕຳແໜ່ງວິຊາການຄູ ຂັ້ນອາຈານ 1 ທ່ານ ແລະ ຂັ້ນ ຜູ້ຊ່ວຍອາຈານ 12 ທ່ານ. ເປັນກຽດຂຶ້ນມອບ ໂດຍ ທ່ານ ປທ ຫຸມພັນ ຄອນສະຫວັດ ຜູ້ອຳນວຍການວິທະຍາໄລຄູຫຼວງພະບາງ ແລະ ມອບໃບຍ້ອງຍໍຂັ້ນກະຊວງສຶກສາທິການ ແລະ ກິລາ, ໃບຍ້ອງຍໍຂັ້ນວິທະຍາໄລຄູ ໃຫ້ແກ່ຄູ-ອາຈານທີ່ສອນດີສອນເກັ່ງ ແລະ ປະກອບສ່ວນວຽກງານພາຍໃນວິທະຍາໄລຄູໃນສົກຮຽນຜ່ານມາ ເປັນກຽດຂຶ້ນມອບໂດຍ ທ່ານ ປທ ສອນເພັດ ສີສະອາດ ຮອງຜູ້ອຳນວຍການວິທະຍາໄລຄູຫຼວງພະບາງ. ໃນຕອນທ້າຍ ທ່ານ ປທ ຫຸມພັນ ຄອນສະຫວັດ ຜູ້ອຳນວຍການວິທະຍາໄລຄູຫຼວງພະບາງ ກໍໄດ້ໃຫ້ຄຳໂອວາດຕັກເຕືອນ ໃຫ້ແກ່ຄູ-ອາຈານທີ່ໄດ້ຮັບຕຳແໜ່ງວິຊາການ ກໍຄື ຄູອາຈານພາຍໃນວິທະຍາໄລຄູທັງໝົດ ໃຫ້ເອົາໃຈໃສ່ສືບຕໍ່ປະຕິບັດວຽກງານໜ້າທີ່ຮັບຜິດຊອບຂອງຕົນ ໃຫ້ກ້າວຂຶ້ນໄປເລື້ອຍໆ ພ້ອມທັງກ່າວປິດກອງປະຊຸມຢ່າງເປັນທາງການ.