ກອງປະຊຸມສະຫຼຸບຂະບວນການແຂ່ງຂັນ 3 ດີ ຂອງຮາກຖານສະຫະພັນແມ່ຍິງ ວິທະຍາໄລຄູຫຼວງພະບາງ ປະຈໍາປີ 2019

ກອງປະຊຸມສະຫຼຸບຂະບວນການແຂ່ງຂັນ 3 ດີ ຂອງຮາກຖານສະຫະພັນແມ່ຍິງ ວິທະຍາໄລຄູຫຼວງພະບາງ ປະຈຳປີ 2019 ໄດ້ຈັດຂຶ້ນໃນຕອນບ່າຍຂອງວັນທີ 22 ກໍລະກົດ 2020 ຢູ່ທີ່ຫ້ອງປະຊຸມ ຕຶກ 3 ຊັ້ນ ວິທະຍາໄລຄູຫຼວງພະບາງ ຢ່າງເປັນທາງການ ໂດຍການເປັນປະທານຂອງທ່ານ ນາງ ບຸນຕາ ສຸລິຍະມາດ ຮອງປະທານສະຫະພັນແມ່ຍິງແຂວງຫຼວງພະບາງ ເຂົ້າຮ່ວມໃນພິທີມີສະຫາຍ ທອງຫລໍ່ ຄຸນສະຫວັດ ຄະນະພັກຮາກຖານ ຄະນະອຳນວຍການ ວິທະຍາໄລຄູຫຼວງພະບາງ ມີທ່ານ ນາງ ດວງມາລາ ຄໍາຕາ ປະທານຮາກຖານສະຫະພັນແມ່ຍິງວິທະຍາໄລຄູຫຼວງພະບາງ. ພິທີຄັ້ງນີ້ ມີຜູ້ເຂົ້າຮ່ວມທັງໝົດ 63 ສະຫາຍ, ໃນພິທີພາຍຫຼັງທີ່ຄະນະຈັດຕັ້ງພິທີໄດ້ຜ່ານຈຸດປະສົງແລ້ວ ທ່ານນາງ ດວງມາລາ ຄໍາຕາ ປະທານຮາກຖານສະຫະພັນແມ່ຍິງວິທະຍາໄລຄູຫຼວງພະບາງ ໄດ້ຜ່ານບົດສະຫຼຸບການກໍ່ສ້າງຮາກຖານສະຫະພັນແມ່ຍິງ 3 ດີ ປີ 2018-2019 ແລະ ຜ່ານແຜນການ ປີ 2019-2020 ຂອງຮາກຖານວິທະຍາໄລຄູຫຼວງພະບາງ.

ວິທະຍາໄລຄູຫຼວງພະບາງ ແມ່ນອົງການຈັດຕັ້ງມະຫາຊົນໜຶ່ງ ມີສະຖານະທຽບເທົ່າກັບອົງການຈັດຕັ້ງອື່ນໆ ມີສາຍຕັ້ງຂຶ້ນກັບສະຫະພັນແມ່ຍິງແຂວງ ຂຶ້ນກັບການຊີ້ນຳຂອງໜ່ວຍພັກວິທະຍາໄລຄູຫຼວງພະບາງ ມີພາລະບົດບາດເປັນເສນາທິການເຄື່ອນໄຫວເຕົ້າໂຮມຄວາມສາມັກຄີເອື້ອຍນ້ອງແມ່ຍິງ ສຶກສາອົບຮົມຊຸກຍູ້ ປຸກລະດົມສະມາຊິກພາຍໃນໜ່ວຍໃຫ້ປະຕິບັດຕາມແນວທາງນະໂຍບາຍຂອງພັກ ລະບຽບຂອງສະຫະພັນແມ່ຍິງວາງອອກ ກົດໝາຍຂອງລັດ ເປັນເຈົ້າການໃນການຈັດຕັ້ງປະຕິບັດວິຊາສະເພາະດ້ວຍຄວາມຮັບຜິດຊອບສູງ ເປັນແບບຢ່າງໃນການດຳລົງຊີວິດດ້ວຍຄວາມປອດໃສຂາວສະອາດ ເປັນແບບຢ່າງໃນການອະນຸລັກຮັກສາວັດທະນະທໍາຮີດຄອງປະເພນີອັນດີງາມຂອງຊາດ ໂດຍສະເພາະແມ່ນຂອງແຂວງຫຼວງພະບາງ. ຄະນະຮາກຖານສະຫະພັນແມ່ຍິງວິທະຍາໄລຄູຫຼວງພະບາງ ໄດ້ສືບຕໍ່ຈັດຕັ້ງປະຕິບັດຂະບວນການແຂ່ງຂັນ 3 ດີເປັນຄັ້ງທີ 5 ໄດ້ປຸກລະດົມເອື້ອຍນ້ອງແມ່ຍິງພາຍໃນໜ່ວຍໃຫ້ມີຄວາມເຂົ້າໃຈຕໍ່ແນວທາງປ່ຽນແປງໃໝ່ຂອງພັກແຕ່ລະໄລຍະ ແຜນພັດທະນາເສດຖະກິດສັງຄົມຂອງລັດຖະບານ ກໍຄືຂອງວິທະຍາໄລຄູຫຼວງພະບາງ ກົດໝາຍຂອງລັດເນື້ອໃນຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ແລະ ໄດ້ເຊື່ອມຊຶມບັນດາມະຕິຄຳສັ່ງຂອງຂັ້ນເທິງ

ຜ່ານການຕີລາຄາສະມາຊິກພາຍໃນໜ່ວຍມີມາດຖານແມ່ຍິງ 3 ດີ ຈຳນວນ 86 ສະຫາຍ ເທົ່າກັບ 93% ໃນພິທີໄດ້ມອບໃບຢັ້ງຢືນໃຫ້ໜ່ວຍຮາກຖານສະຫະພັນແມ່ຍິງວິທະຍາໄລຄູຫຼວງພະບາງ ເປັນໜ່ວຍແມ່ຍິງ 3 ດີ ຄັ້ງທີ 5 ໃຫ້ກຽດຂຶ້ນມອບ ໂດຍທ່ານນາງ ບຸນຕາ ສຸລິຍະມາດ ຮອງປະທານສະຫະພັນແມ່ຍິງ ແຂວງຫຼວງພະບາງ ແລະ ຮັບໂດຍ ທ່ານນາງ ດວງມາລາ ຄໍາຕາ ປະທານຮາກຖານສະຫະພັນແມ່ຍິງວິທະຍາໄລຄູຫຼວງພະບາງ ແລະ ໄດ້ມອບໃບຍ້ອງຍໍ ເອື້ອຍນ້ອງແມ່ຍິງພາຍໃນໜ່ວຍ.

ໃນຕອນທ້າຍຂອງພິທີໄດ້ຮັບຟັງການໂອ້ລົມຂອງທ່ານນາງ ບຸນຕາ ສຸລິຍະມາດ ຮອງປະທານສະຫະພັນແມ່ຍິງແຂວງຫຼວງພະບາງ ເຊິ່ງໄດ້ຮຽກຮ້ອງໃຫ້ສະມາຊິກຮາກຖານວິທະຍາໄລຄູຫຼວງພະບາງ ຈົ່ງຮັກສາມູນເຊື້ອດັ່ງກ່າວນີ້ໄວ້ໃຫ້ໝັ້ນຄົງ.

ຂ່າວສານໂດຍ: ປຕ ສຸລິຈັນ ສຸກສະຫວັດ

ຖ່າຍພາບໂດຍ: ປຕ ສຸລິຈັນ ສຸກສະຫວັດ

ໜ່ວຍງານເກັບກຳຂໍ້ມູນຂ່າວສານ ຫ້ອງການວັດ-ປະເມີນຜົນ ວິທະຍາໄລຄູຫຼວງພະບາງ