ກອງປະຊຸມສຳມະນາແລກປ່ຽນບົດຮຽນໃນການນຳພາຂອງຄະນະພັກຮາກຖານວິທະຍາໄລຄູຫຼພະບາງ ຄັ້ງວັນທີ 26 ພຶດສະພາ 2020

ກອງປະຊຸມ ໄດ້ໄຂຂຶ້ນ ແລະ ປິດລົງ ໃນຕອນເຊົ້າ ມື້ວັນທີ 26 ພຶດສະພາ 2020 ທີ່ຫ້ອງປະຊຸມວິທະຍາໄລຄູຫຼວງພະບາງ. ໂດຍການເປັນປະທານຂອງ ສະຫາຍ ບຸນສຸວັນ ລັດຕະນາ ອະດີດເລຂາຄະນະພັກຊຸດທີ IV ວິທະຍາໄລຄູຫຼວງພະບາງ, ໃຫ້ກຽດ ເຂົ້າຮ່ວມໂດຍ ສະຫາຍ ຫຸມພັນ ຄອນສະຫວັດ ເລຂາຄະນະພັກຮາກຖານ ວິທະຍາໄລຄູຫຼວງພະບາງ, ສະຫາຍ ສອນເພັດ ສີສະອາດ ຮອງເລຂາຄະນະພັກຊຸດ ທີ IV ວິທະຍາໄລຄູຫຼວງພະບາງ, ສະຫາຍ ທອງຫລໍ່ ຄຸນສະຫວັດ ຮອງເລຂາຄະນະພັກ ວິທະຍາໄລຄູຫຼວງພະບາງ ມີຄະນະພັກເຂົ້າຮ່ວມທັງໝົດ 13 ສະຫາຍ, ຍິງ 2 ສະຫາຍ.

ໃນກອງປະຊຸມໄດ້ສະເໜີຜົນການຊີ້ນຳນຳພາໃນໄລຍະ 5 ປີ ຜ່ານມາ, ໃນກອງປະຊຸມ ຄະນະພັກຊຸດທີ IV ໄດ້ມີຄຳເຫັນໃຫ້ທິດຊີ້ນຳ ແລະ ບາງວິທີແກ້ໄຂ ເພື່ອເປັນທິດຊີ້ນຳໃຫ້ແກ່ ວິທະຍາໄລຄູຫລວງພະບາງ ມີການພັດທະນາດີຂຶ້ນ ຮັບປະກັນຄຸນນະພາບ ດຳເນີນໄປຖືກທິດ, ຕາມແນວທາງການນໍາພາຂອງພັກ ໄດ້ມີຄຳເຫັນຕໍ່ຄະນະພັກຊຸດໃຫມ່ ສືບຕໍ່ຍົກສູງການຊີ້ນຳນຳພາວິທະຍາໄລຄູໄປຕາມທິດນຳຂອງພັກ-ລັດວາງອອກ ຮັບປະກັນຄຸນນະພາບ ເຮັດໃຫ້ການຈັດຕັ້ງປະຕິບັດໜ້າທີ່ວຽກງານວິຊາສະເພາະຖືກຕ້ອງຕາມພາລະບົດບາດ, ສົນທະນາວິທີກໍ່ສ້າງໃຫ້ວິທະຍາໄລຄູເປັນໜ່ວຍພັກໂປ່ງໃສ ເຂັ້ມແຂງ ແລະ ໜັກແໜ້ນ, ສືບຕໍ່ນຳພາມະຫາຊົນປະຕິບັດໜ້າທີ່ໃຫ້ປາກົດຜົນເປັນຈິງ, ພ້ອມກັນເຝິກຝົນຫລໍ່ຫລອມຕົນເອງ ທາງດ້ານຄຸນສົມບັດປະຕິວັດ ໃຫ້ນັບມື້ນັບດີຂຶ້ນເປັນກ້າວໆ.

ຄາດໝາຍສູ້ຊົນ ຍົກລະດັບດ້ານວຸດທິ, ຕຳແໜ່ງວິຊາການ, ສ້າງເຄືອຂ່າຍການຮ່ວມມືກັບສະຖາບັນການສຶກສາພາຍໃນ ແລະ ຕ່າງປະເທດ, ອຳນວຍຄວາມສະດວກໃຫ້ແກ່ການຮຽນ-ການສອນໄດ້ຮັບການພັດທະນາດີຂຶ້ນ ສືບຕໍ່ພັດທະນາວິຊາຟີຊິກສາດ ແລະຊີວະສາດ ເພື່ອເປັນສູນແຫ່ງການພັດທະນາ, ພັດທະນາໂຮງຮຽນສາທິດຊັ້ນອະນຸບານ, ປະຖົມ  ແລະ ມັດທະຍົມສາທິດໃຫ້ເປັນໂຮງຮຽນຕົວແບບ, ສົ່ງເສີມໃຫ້ຄູ-ອາຈານ ແລະ ນັກສຶກສາມີຄວາມຮູ້ດ້ານພາສາອັງກິດ, ຄອມພິວເຕີ ສາມາດສື່ສານຜ່ານທາງອິນເຕີເນັດໄດ້. ແນໃສ່ເພື່ອພັດທະນາວິທະຍາໄລຄູຫລວງພະບາງໃຫ້ເປັນສູນກາງການສຶກສາທີ່ມີຄວາມເຂັ້ມແຂງ ເປັນບ່ອນກໍ່ສ້າງຊັບພະຍາກອນມະນຸດ, ນັກສຶກສາຄູໃຫ້ມີຄວາມຮູ້ ຄວາມສາມາດ ຄຸນສົມບັດ ຈັນຍາບັນ ປະກອບສ່ວນເຂົ້າໃນການພັດທະນາຊັບພະຍາກອນມະນຸດ ກໍຄືເສດຖະກິດສັງຄົມຂອງຊາດ ສາມາດເຊື່ອມໂຍງກັບພາກພື້ນ ແລະ ສາກົນ.

ຂ່າວສານໂດຍ: ປ.ຕີ ສຸລິຈັນ ສຸກສະຫວັດ

ຖ່າຍພາບໂດຍ: ປ.ຕີ ສຸລິຈັນ ສຸກສະຫວັດ