ຄະນະອຳນວຍການ ວິທະຍາໄລຄູ ຫຼວງພະບາງ ເດີນທາງຢ້ຽມຢາມມະຫາວິທະຍາໄລແຫ່ງຊາດສ້າງຄູຈິນຈູ ສາທາລະນະລັດເກົາຫຼີ

ລະຫວ່າງວັນ​ທີ 22-26 ​ຕຸລາ (10) 2019 ນີ້ ທິມງານຈາກວິທະຍາໄລຄູຫຼວງພະບາງ ພາຍໃຕ້ການນໍາພາຂອງທ່ານ ບຸນສຸວັນ ລັດຕະນາ ຜູ້ອໍານວຍການໂຮງຮຽນວິທະຍາໄລຄູຫຼວງພະບາງໄດ້ນໍາພາຄະນະນໍາຈາກວິທະຍາໄລຄູຫຼວງພະບາງລວມທັງໝົດ4ທ່ານໃນນັ້ນຄະນະນໍາວິທະຍາໄລຄູຫຼວງພະບາງ3ທ່ານ ແລະ ຕາງໜ້າໃຫ້ກະຊວງສຶກສາທິການ ແລະ ກິລາ1ທ່ານໂດຍແມ່ນ ທ່ານ ເກດ ພັນລັກ ຫົວໜ້າກົມສ້າງຄູກະຊວງສຶກສາທິການ ແລະ ກິລາ ກໍໄດ້ໃຫ້ກຽດຮ່ວມການເດີນທາງນໍາພວກເຮົາດ້ວຍເພື່ອຢ້ຽມຢາມມະຫາວິທະຍາໄລແຫ່ງຊາດສ້າງຄູຈິນຈູທີ່ເມືອງຈິນຈູ ສ ເກົາຫລີ ຕາມຄໍາເຊື້ອເຊີນຂອງທ່ານ ດຣ ມູນຊອງຈອຍ (Dr. Moon-seong Choi) ອະທິການບໍດີມະຫາວິທະຍາໄລ

ແຫ່ງຊາດສ້າງຄູ ຈິນຈູ, ເຊິ່ງຈຸດປະສົງຂອງການຢ້ຽມຢາມແມ່ນເພື່ອຢ້ຽມຢາມສະພາບແວດລ້ອມສະຖານທີ່ການສຶກສາພາຍໃນມະຫາວິທະຍາໄລ ແລະ ເຊັນບົດບັນທຶກຄວາມເຂົ້າໃຈ (MOU) ກ່ຽວກັບການຮ່ວມມືທາງດ້ານວິຊາການ ແລະ ການແລກປ່ຽນດ້ານວັດທະນະທໍາ ລະຫວ່າງ ຄະນະອໍານວຍການວິທະຍາໄລຄູຫຼວງພະບາງ ກັບ ຄະນະບໍດີມະຫາວິທະຍາໄລແຫ່ງຊາດສ້າງຄູຈິນຈູເພື່ອຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນໃນຕໍ່ໜ້າ3ດ້ານໃຫຍ່ຄື:

  1. ການແລກປ່ຽນຄວາມຮູ້ ແລະ ປະສົບການດ້ານການຮຽນການສອນຂອງຄູອາຈານ ແລະ ນັກສຶກສາຂອງ2ສະຖາບັນນໍາກັນທີ່ເຫັນດີເຫັນພ້ອມນໍາກັນທັງສອງຝ່າຍ
  2. ແລກປ່ຽນຂໍ້ມູນຂ່າວສານທາງດ້ານວິຊາການນໍາກັນເຊັ່ນ ການຄົ້ນຄ້ວາວິໄຈການຮຽນການສອນ,ການຈັດຕັ້ງການປະຊຸມສໍາມະນາທາງດ້ານວິຊາການໃຫ້ແກ່ຄູອາຈານ ແລະ ນັກສຶກສາໂດຍເນັ້ນໃສ່ການຈັດການຮຽນການສອນກ່ຽວກັບວິທະຍາສາດໃນສະຕະວັດທີ 21 ທີ່ທັງສອງຝ່າຍເຫັນດີນໍາກັນ
  3. ການແລກປ່ຽນທາງດ້ານວັດທະນະທໍາເປັນຕົ້ນແມ່ນການສະແດງສິນລະປະວັນນະຄະດີ ແລະ ວິຖີຊີວິດຊາວລາວ ແລະ ຊາວເກົາຫຼີ

ເຊິ່ງບົດບັນທຶກຄວາມເຂົ້າໃຈດັ່ງກ່າວ, ທາງມະຫາາວິທະຍາໄລແຫ່ງຊາດຈິນຈູ ສົມທົບກັບຄະນະນໍາວິທະຍາໄລຄູຫຼວງພະບາງໄດ້ຈັດຕັ້ງພິທີລົງນາມບົດບັນທຶກຄວາມເຂົ້າໃຈຮ່ວມກັນຂຶ້ນໃນຕອນແລງເວລາ      3ມ 00 ຂອງວັນທີ 23/102019ໂດຍແມ່ນທ່ານ ບຸນສຸວັນ ລັດຕະນາ ຜູ້ອໍານວຍການວິທະຍາໄລຄູຫຼວງພະບາງຕາງໜ້າຝ່າຍລາວເປັນຜູ້ລົງນາມ ໂດຍມີທ່ານ ເກດ ພັນລັກ ຫົວໜ້າກົມສ້າງຄູຮ່ວມເປັນສັກຂີພິຍານນໍາ ແລະ ທ່ານ ດຣ ມູນຊອງຈອຍ (Dr. Moon-seong Choi) ອະທິການບໍດີມະຫາວິທະຍາໄລແຫ່ງຊາດສ້າງຄູ ຈິນຈູ ຕາງໜ້າໃຫ້ຝ່າຍ ສ ເກົາຫຼີ ເປັນຜູ້ລົງນາມ ແລະ ມີບັນທ່ານຄະນະບໍດີ, ຄະນະຜູ້ບໍລິຫານ, ຄູອາຈານຈາກມະມະຫາວິທະຍາໄລແຫ່ງຊາດຈິນຈູຮ່ວມເປັນສັກຂີພິຍານເປັນຈໍານວນຫຼາຍພໍສົມຄວນ ຫຼັງຈາກນັ້ນທັງສອງຝ່າຍກໍໄດ້ພັດປ່ຽນກັນມອບຂອງທີ່ລະນຶກເຊິ່ງກັນ ແລະ ກັນ. ອີກປະການໜຶ່ງເພື່ອຜູກແໜ້ນຄວາມສາມັກຄີລະຫວ່າງຄະນະນໍາທັງສອງສະຖາບັນ, ຕອນຄໍ່າທາງມະຫາວິທະຍາໄລຍັງໄດ້ຈັດງານລ້ຽງຮັບຮອງໃຫ້ແກ່ທິມງານຈາກວິທະຍາໄລຄູຫຼວງພະບາງຢ່າງມີບັນຍາກາດຝົດຟື້ນມ່ວນຊຶ່ນ ແລະ ເຕັມໄປດ້ວຍໄມຕີຈິດມິດຕະພາບເຊິ່ງກັນ ແລະ ກັນດີ.

ເພື່ອເປັນການເຜີຍແຜ່ຂໍ້ມູນຂ່າວສານໃຫ້ແກ່ຄູ່ຮ່ວມມືໄດ້ຮັບຊາບນໍາ, ທາງທິມງານຈາກວິທະຍາໄລຄູກໍໄດ້ມີໂອກາດເຜີຍແຜ່ຂໍ້ມູນຂ່າວສານກ່ຽວກັບວັດທະນະທໍາທີ່ດີງາມຂອງຊາວລາວໂດຍສະເພາະແມ່ນຂອງຊາວຫຼວງພະບາງ, ສະຖານທີ່ແຫຼ່ງທ່ອງທຽວທາງດ້ານປະຫວັດສາດ ແລະ ວັດທະນະທໍາຂອງຕົວເມືອງຫຼວງພະບາງເມືອງມໍລະດົກໂລກ, ຂໍ້ມູນ ແລະ ການເຄື່ອນໄຫວກ່ຽວກັບວິທະຍາໄລຄູຫຼວງພະບາງເຜີຍແພ່ໃຫ້ແກ່ຄະນະຄູອາຈານ ແລະ ນັກສຶກສາພາຍໃນມະຫາວິທະຍາໄລແຫ່ງຊາດສ້າງຄູຈິນຈູຕື່ມອີກ, ບໍ່ພຽງແຕ່ເທົ່ານີ້ທາງມະຫາວິທະຍາໄລຍັງໃຫ້ໂອກາດ ນໍາພາຄະນະນໍາພວກເຮົາ ລົງຢ້ຽມຢາມສະພາບແວດລ້ອມ ແລະ ພົບປະແລກປ່ຽນກັບຄູອາຈານ ແລະ ນັກ ຮຽນໂຮງຮຽນປະຖົມຈໍານວນ 2ແຫ່ງ ຄືໂຮງຮຽນປະຖົມ ບູໂຊນ(BU-SEOL Education)ເຊິ່ງເປັນໂຮງຮຽນປະຖົມສາຖິດຂອງມະຫາວິທະຍາໄລແຫ່ງຊາດສ້າງຄູ ຈິນຈູ ແລະ ໂຮງຮຽນປະຖົມ ຊາມດົງ Samdong. ນອກຈາກນີ້, ທາງຄະນະນໍາພວກເຮົາຍັງໄດ້ມີໂອກາດທ່ຽວຊົມສະຖານທີ່ທ່ອງທ່ຽວ, ຫໍພິພິດຕະພັນ, ສູນສຶກສາວິທະຍາສາດ ແລະ ການທ່ອງທ່ຽວ ແລະ ຢ້ຽມຢາມສູນວັດທະນະທໍາຂອງເກົາຫຼີທີ ຊານຊ່ອງຂຶນຕຶຣ ເພື່ອເກັບກ່ຽວປະສົບການຕື່ມອີກ.

dig

ດັ່ງນັ້ນ, ຖືວ່າການໄປຢ້ຽມຢາມຂອງຄະນະທິມງານຂອງວິທະຍາໄລຄູຫຼວງພະບາງນໍາໂດຍທ່ານຜູ້ອໍານວຍການໂຮງຮຽນຄັ້ງນີ້ແມ່ນມີຜົນສໍາເລັດອັນດີ ໄດ້ຕາມວັດຖຸປະສົງຂອງແຜນການວາງໄວ້ດີພໍສົມຄວນ ແລະ ການຢ້ຽມຢາມຄັ້ງນີ້ ກໍຖືວ່າເປັນບາດກ້າວທີ່ສໍາຄັນທີຈະນໍາໄປສູ່ ການພົວພັນແລກປ່ຽນບົນພື້ນຖານບົດບັນທຶກຄວາມເຂົ້າໃຈທີ່ທັງສອງຝ່າຍໄດ້ລົງນາມຮ່ວມກັນເພື່ອຜົນປະໂຫຍດການຮ່ວມມື ແລະ ເພື່ອການພັດທະນາໃນອານາຄົດອັນໃກ້ ແນໃສ່ເຮັດໃຫ້ສອງສະຖາບັນມີຄວາມກ້າວໜ້າຂະຫຍາຍຕົວໄປພ້ອມໆກັນປະການສໍາຄັນເພື່ອພັດທະນາວິທະຍາໄລຄູຫຼວງພະບາງກ້າວໄປສູ່ສູນແຫ່ງການພັດທະນາ ແລະ ສູນແຫ່ງຄວາມເປັນເລີດໃນອານາຄົດ.

ຂ້າພະເຈົ້າ, ຂໍຕາງໜ້າໃຫ້ທິມງານຂໍສະແດງຄວາມຮູ້ບຸນຄຸນ ແລະ ຂອບໃຈຢ່າງສູງມາຍັງ ທ່ານ Dr. Moon-seong Choi ອະທິການບໍດີມະຫາວິທະຍາໄລແຫ່ງຊາດສ້າງຄູ ຈິນຈູ ພ້ອມດ້ວຍຄະນະທີ່ໃຫ້ການຮ່ວມື ແລະ ອຸປະຖໍາຄໍ້າຊູສິ່ງອໍານວຍຄວາມສະດວກທຸກຢ່າງໃຫ້ແກ່ການຢ້ຽມຢາມທິມງານຂອງພວກຂ້າພະເຈົ້າຄັ້ງນີ້ປະສົບຜົນສໍາເລັດອັນດີທຸກປະການ.

ຂໍສະແດງຄວາມຂອບໃຈຢ່າງສູງມາຍັງທ່ານ ອາຈານ ພາກແທຍ່ອງ ທີ່ໄດ້ໃຫ້ການຊຸກຍູ້ ແລະ ຊ່ວຍເຫຼືອ ຕິດຕໍ່ສື່ສານລະຫວ່າງ2ສະຖາບັນໃຫ້ມີການຮ່ວມມືພ້ອມທັງຊ່ວຍເຫຼືອແນະນໍາໃນດ້ານຕ່າງໆໃນການເດີນທາງເຮັດໃຫ້ວຽກງານການຢ້ຽມຢາມ ແລະ ການເຊັນບົດບັນທຶກຄວາມເຂົ້າໃຈລະຫວ່າງວິທະຍາໄລຄູຫຼວງພະບາງກັບມະຫາວິທະຍາໄລແຫ່ງຊາດສ້າງຄູຈິນຈູປະສົບຜົນສໍາເລັດອັນດີ.

ໂດຍ: ອຈ ປທ ຫຸມພັນ ຄອນສະຫວັດ