ງານກວດ​ສອບສິລະປະ-ວັນນະຄະດີ ນັກສຶກສາວິທະຍາໄລຄູຫຼວງພະບາງ ສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 44 ປີ

ວິ​ທະ​ຍາ​ໄລ​ຄູຫຼວງພະບາງ ໄດ້ຈັດງານກວດ​ສອບສິລະປະ-ວັນນະຄະດີ ນັກສຶກສາພາຍໃນສະ​ຖາ​ບັນເພື່ອສະເຫຼີມສະຫຼອງວັນ​ສະ​ຖາ​ປະ​ນາ ສ​ປ​ປ ລາວ ຄົບຮອບ 44 ປີ (2 ທັນ​ວາ 1975 – 2 ທັນ​ວາ 2019) ຊຶ່ງຈັດຂື້ນໃນຕອນຄ່ຳ ຂອງວັນທີ 29 ພະ​ຈິກ 2019 ທີ່ຜ່ານມາ ທີ່​ສະ​ໂມ​ສອນໃຫຍ່​ຂອງວິ​ທະ​ຍາ​ໄລ​ຄູຫຼວງພະບາງ ໂດຍການເປັນປະທານຂອງ ທ່ານ ທອງຫຼໍ່ ຄຸນ​ສະ​ຫວັດ ​ຮອງ​ຜູ້​ອຳ​ນວຍ​ການ​ວິ​ທະ​ຍາ​ໄລ​ຄູຫຼວງພະບາງ, ມີທ່ານ ແສງ​ທອງ ຟອງວິ​ໄລ ຮັກສາການ​ຫົວ​ໜ້າ​ຫ້ອງ​ການ​ກິດ​ຈະ​ການ​ນັກ​ສຶກ​ສາ, ມີ ພະນັກ ງານຄູ-ອາຈານ, ນັກສຶກສາຕະຫຼອດຮອດ ນັກສະແດງສິລະປະ ແລະ ​ນັກ​ຮ້ອງເຂົ້າຮ່ວມ​ຢ່າງ​ມ່ວນ​ຊື່ນ.ທັງນີ້ເພື່ອເປັນການຫວນຄືນຂະບວນການຕໍ່ສູ້ຕ້ານຈັກກະພັດລ່າເມືອງຂື້ນທັງແບບເກົ່າ ແລະ ແບບ ໃໝ່ ຂອງປະຊາຊົນລາວບັນດາເຜົ່າ ແລະ ລະນຶກເຖິງຄຸນງາມຄວາມດີ ຂອງ​ຜູ້​ເສຍ​ສະຫຼະ​ເລືອດ​ເນື້ອ​ເພື່ອ​ຊາດ​ກໍ​ຄື ​ການຕໍ່​ສູ້​ປົດ​ປ່ອຍ​ປະ​ເທດ​ຊາດ​ຈາກ​ພວ​ກະ​ພັດ​ລ່າ​ເມືອງ​ຂື້ນ. ສຳລັບການຈັດງານແຂ່ງຂັນສິລະປະ-ວັນນະຄະດີ ພາຍ​ໃນ​ສະ​ຖາ​ບັນຄັ້ງນີ້ ກໍເພື່ອເປັນການສະເຫຼີມສະຫຼອງວັນ​ສະ​ຖາ​ປະ​ນາ ສ​ປ​ປ ລາວ ຄົບຮອບ 44 ປີ,ອີກທັງເປັນການຈັດຕັ້ງປະຕິບັດຕາມ 5 ຫຼັກມູນຂອງການສຶກສາ ພ້ອມທັງຕ້ານ ແລະ ສະກັດກັ້ນປະກົດການຫຍໍ້ທີ່ອາດຈະເກີດຂຶ້ນພາຍໃນ​ສະ​ຖາ​ບັນ ແລະ ອີກດ້ານໜຶ່ງກໍ່ເພື່ອຜູກແໜ້ນຄວາມສາມັກຄີລະຫວ່າງຜູ້ນັກສຶກສາດ້ວຍກັນ.ໃນການແຂ່ງຂັນປະກອບມີ ບົດຟ້ອນລວມໝູ່ ແລະ ຮ້ອງເພງຍິງ-ຊາຍ, ສ່ວນບົດຟ້ອນລວມໝູ່ ແລະ ຮ້ອງເພງ​ຍິງ-ຊາຍມີ 9 ສາຂາວິ​ຊາ​ສະ​ເພາະເຂົ້າຮ່ວມຢ່າງຟົດຟື້ນ, ຜ່ານການແຂ່ງຂັນ ບົດຟ້ອນລວມໝູ່ອັນດັບທີ 1 ແມ່ນສາຍຄູ​ອາ​ນຸ​ບານ ໄດ້ຮັບເງິນສົດ 600.000 ກີບ, ອັນດັບທີ 2 ສາຍຄູປະຖົມ ໄດ້ຮັບເງີນສົດ 400.000 ກີບ ແລະ ອັນດັບທີ 3 ແມ່ນໄດ້ຮ່ວມກັນ 2 ສາຍຄູຄື ໄອຊີທີ-ພື້ນຖານວິຊາຊີບ ແລະ ສາຍຄູຊີວະສາດ ໄດ້ຮັບເງີນສົດຮ່ວມກັນ 300.000 ກີບ, ສ່ວນການຮ້ອງເພງຍິງ ອັນດັບທີ 1 ແມ່ນສາຍຄູພາສາຝຣັ່ງ ໄດ້ຮັບເງິນສົດ 300.000 ກີບ, ອັນດັບທີ 2 ສາຍຄູອານຸບານ ໄດ້ຮັບເງີນສົດ 200.000 ກີບ ແລະ ອັນດັບທີ 3 ສາຍຄູ ເຄມີ ໄດ້ຮັບເງີນສົດ 100.000 ກີບ, ສ່ວນການຮ້ອງເພງຊາຍ ອັນດັບທີ 1 ແມ່ນສາຂາຄູຊີວະສາດ ໄດ້ຮັບເງິນສົດ 300.000 ກີບ, ອັນດັບທີ 2 ສາຂາຄູເຄມີສາດ ໄດ້ຮັບເງີນສົດ 200.000 ກີບ ແລະ ອັນດັບທີ 3 ສາຂາຄູຟິຊິກສາດ ໄດ້ຮັບເງີນສົດ 100.000 ກີບ

ຂ່າວ​ສານ​ໂດຍ: ທ່ານ ຜູ້​ຊ່ວຍ​ອາ​ຈານ ປ.ຕີ ປະ​ນົມ​ພອນ ຄອນ​ສະ​ຫວັດ

ພາບໂດຍ: ທ່ານ ນາງ ປ.ຕີ ບົວວັນ ພັນທະນິດ

ໜ່ວຍ​ງານ​ຂໍ້​ມູນ​ຂ່າວ​ສານ