ພິທິມອບ-ຮັບ ເຄື່ອງຊ່ວຍເຫຼືອຈາກອົງການກາແດງລາວແຂວງຫຼວງພະບາງໃຫ້ແກ່ຄູ ແລະ ນັກສຶກສາໃນຫໍພັກວິທະຍາໄລຄູຫຼວງພະບາງ

ພິທີມອບ-ຮັບ ເຄື່ອງຊ່ວຍເຫຼືອຈາກອົງການກາແດງລາວ ແຂວງຫຼວງພະບາງ ໃຫ້ແກ່ຄູ ແລະ ນັກສຶກສາໃນຫໍພັກວິທະຍາໄລຄູຫຼວງພະບາງ
ໃນຕອນເຊົ້າຂອງວັນທີ 12 ພຶດສະພາ 2021, ທີ່ເດີ່ນໜ້າຫ້ອງການ ວິທະຍາໄລຄູຫຼວງພະບາງ ໄດ້ມີພິທີມອບ-ຮັບ ເຄື່ອງຊ່ວຍເຫຼືອອຸປະໂພກ-ບໍລິໂພກ ຈາກອົງການກາແດງລາວ ແຂວງຫຼວງພະບາງ ໃຫ້ແກ່ຄູ ແລະ ນັກສຶກສາໃນຫໍພັກ ວິທະຍາໄລຄູຫຼວງພະບາງ ລວມມູນຄ່າ 7,432,000 ກີບ. ໃຫ້ກຽດຕາງໜ້າກ່າວມອບໂດຍ ທ່ານ ດຣ ວຽງສະຫວັນ ກະເສີມສຸກ ຫົວໜ້າອົງການກາແດງລາວແຂວງຫຼວງພະບາງ ແລະ ຕາງໜ້າກ່າວຮັບໂດຍ ທ່ານ ປທ ຫຸມພັນ ຄອນສະຫວັດ ຜູ້ອຳນວຍການວິທະຍາໄລຄູຫຼວງພະບາງ, ເຊິ່ງມີບັນດາຜູ້ຕາງໜ້າ ທັງສອງຝ່າຍ ແລະ ບັນດາຫົວໜ້າຫ້ອງການ, ຄູ-ອາຈານ, ພະນັກງານ, ນັກສຶກສາເຂົ້າຮ່ວມຢ່າງພ້ອມພຽງ. ໂອກາດດັ່ງກ່າວ ທ່ານ ປທ ຫຸມພັນ ຄອນສະຫວັດ ຜູ້ອຳນວຍການວິທະຍາໄລຄູຫຼວງພະບາງ ກໍໄດ້ຕາງໜ້າທາງຄູ-ອາຈານ ແລະ ນັກສຶກສາ ຂໍສະແດງຄວາມຂອບໃຈເປັນຢ່າງສູງ ທີ່ອົງການກາແດງລາວແຂວງຫຼວງພະບາງ ທີ່ມີຄວາມເປັນຫ່ວງເປັນໄຍຊີວິດການເປັນຢູ່ ແລະ ໃຫ້ການຊ່ວຍເຫຼືອວິທະຍາໄລຄູຂອງພວກເຮົາ. ສິ່ງເຫຼົ່ານີ້ ເປັນການສະແດງເຖິງນໍ້າໃຈເອື້ອເຟື້ອເພື່ອແຜ່, ສະແດງເຖິງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີຊ່ວຍເຫລືອ ລະຫວ່າງ ວິທະຍາໄລຄູຫຼວງພະບາງ ກັບ ອົງການກາແດງລາວແຂວງຫຼວງພະບາງ. ຂໍອວຍພອນໄຊອັນປະເສີດ ມາຍັງທ່ານຫົວໜ້າ ພ້ອມດ້ວຍສະມາຊິກ ກາແດງໝົດທຸກຄົນ ຈົ່ງມີສຸຂະພາບແຂງແຮງ ປະສົບຜົນສໍາເລັດໃນໜ້າທີ່ການງານ ທຸກໆທ່ານ.
ຂ່າວສານໂດຍ: ປຕ ສຸລິຈັນ ສຸກສະຫວັດ
ພາບໂດຍ: ປຕ ສຸລິຈັນ ສຸກສະຫວັດ ໜ່ວຍງານເກັບກຳ-ສັງລວມຂໍ້ມູນ/ຂ່າວສານ ຫ້ອງການວັດຜົນ-ປະເມີນຜົນ ວິທະຍາໄລຄູຫຼວງພະບາງ