ພິທີມອບ-ຮັບ ໜ້າທີ່ລະຫວ່າງຜູ່ອຳນວຍການ ຜູ້ເກົ່າ-ຜູ້ໃໝ່ ແລະປະກາດ ຜູ້ດຳລົງຕໍາແໜ່ງ ຮອງອຳນວຍການຜູ້ໃໝ່ ຄັ້ງວັນທີ 11 ມີຖຸນາ (6) 2020 ທີ່ຫ້ອງປະຊຸມວິທະຍາໄລຄູຫຼວງພະບາງ

ໃນຕອນເຊົ້າຂອງວັນທີ 11 ມີຖຸນາ (6) 2020 ທີ່ຫ້ອງປະຊຸມວິທະຍາໄລຄູຫຼວງພະບາງ ໄດ້ຈັດພິທີ ມອບ-ຮັບ ໜ້າທີ່ລະຫວ່າງ ຜູ່ອຳນວຍການຜູ້ເກົ່າ-ຜູ້ໃໝ່ ແລະ ປະກາດຜູ້ດຳລົງຕໍາແໜ່ງຮອງອຳນວຍການຜູ້ໃໝ່ ໃຫ້ກຽດເປັນປະທານໃນພິທີຄັ້ງນີ້ ໂດຍ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ສຸກັນ ບຸນຍົງ ຮອງເຈົ້າແຂວງ ແຂວງຫຼວງພະບາງ, ຕາງໜ້າກົມ ແລະ ບັນດາຄະນະອຳນວຍການອ້ອມຂ້າງແຂວງ, ຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າໜ່ວຍງານ ພ້ອມດ້ວຍບັນດາແຂກທີ່ຖືກເຊີນ ເຂົ້າຮ່ວມທັງໝົດ 60 ທ່ານ, ຍິງ 22 ທ່ານ.

ໃນພິທີ ຕາງໜ້າກົມຈັດຕັ້ງພະນັກງານກະຊວງສຶກສາທິການ ແລະ ກິລາ ໄດ້ຂຶ້ນຜ່ານຂໍ້ຕົກລົງຂອງທ່ານລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 8432/ສສກ ລົງວັນທີ 5 ທັນວາ 2019 ວ່າດ້ວຍການອະນຸມັດໃຫ້ພະນັກງານລັດຖະກອນອອກພັກການ ເພື່ອຮັບອຸດໜູນເບ້ຍບໍານານ, ທ່ານລັດຖະມົນຕີກະຊວງສຶກສາທິການ ແລະ ກິລາໄດ້ຕົກລົງເຫັນດີ ໃຫ້ທ່ານ ບຸນສຸວັນ ລັດຕະນາ ຜູ່ອຳນວຍການວິທະຍາໄລຄູ ອອກພັກຜ່ອນຮັບອຸດໜູນເບ້ຍບໍານານ ພາຍຫຼັງຮອດອາຍຸກະສຽນຕາມລະບຽບກົດໝາຍ ວ່າດ້ວຍພະນັກງານລັດຖະກອນ. ຜ່ານຂໍ້ຕົກລົງທ່ານລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 1409/ສສກ ລົງວັນທີ 28 ພຶດສະພາ 2020 ວ່າດ້ວຍການແຕ່ງຕັ້ງພະນັກງານດຳລົງຕໍາແໜ່ງບໍລິຫານວິທະຍາໄລຄູຫຼວງພະບາງ, ລັດຖະມົນຕີກະຊວງສຶກສາທິການ ແລະ ກິລາ ຕົກລົງເຫັນດີ ອະນຸມັດແຕ່ງຕັ້ງ ທ່ານ ຫຸມພັນ ຄອນສະຫວັດ ຮອງຜູ່ອຳນວຍການ ຂຶ້ນເປັນຜູ່ອຳນວຍການວິທະຍາໄລຄູຫຼວງພະບາງ ຜູ້ໃໝ່ ແລະ ຜ່ານຂໍ້ຕົກລົງຂອງທ່ານລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 1093/ ສສກ ວ່າດ້ວຍການແຕ່ງຕັ້ງພະນັກງານດຳລົງຕໍາແໜ່ງຜູ້ບໍລິຫານວິທະຍາໄລຄູຫຼວງພະບາງ ເຫັນດີຕົກລົງແຕ່ງຕັ້ງ ທ່ານ ອານຸນິດ ມະໂນສານ ຫົວໜ້າຫ້ອງການ ວັດ-ປະເຜີນຜົນວິທະຍາໄລຄູ ຂຶ້ນເປັນຮອງອຳນວຍການວິທະຍາໄລຄູຫຼວງພະບາງ.

ໃນພິທີ ໄດ້ມອບໃບຍ້ອງຍໍຜົນງານດີເດັ່ນໃນໄລຍະການດຳລົງຕຳແໜ່ງໃນການຈັດຕັ້ງປະຕິບັດວຽກງານຜ່ານມາ ໃຫ້ກຽດຂຶ້ນມອບ ໂດຍ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ. ໃນຂະນະດຽວກັນນີ້ທ່ານ ບຸນສຸວັນ ລັດຕະນາ ຜູ່ອຳນວຍການຄົນເກົ່າ ໄດ້ຂຶ້ນກ່າວຜົນງານການເຄື່ອນໄຫວໃນໄລຍະທີ່ຕົນໄດ້ດຳລົງຕຳແໜ່ງໂດຍໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານ ແລະ ຂໍ້ຄົງຄ້າງບາງບັນຫາ, ໃນນີ້ທ່ານໄດ້ຝາກຝັງມາຍັງຜູ່ອຳນວຍການຄົນຕໍ່ໄປ ພ້ອມດ້ວຍຄະນະພັກຮາກຖານ ທີມງານຄະນະອຳນວຍການ ໃຫ້ກຳແໜ້ນແນວທາງນະໂຍບາຍ ແລະ ເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ, ຮັກສາຜົນງານ ແລະ ມູນເຊື້ອຄວາມສາມັກຄີອັນດີງາມ ພ້ອມທັງເສີມຂະຫຍາຍໃຫ້ດີຂຶ້ນກວ່າເກົ່າ, ໃຫ້ສືບສານຕໍ່ບັນດາໂຄງການຕ່າງໆທີ່ກຳລັງດຳເນີນການໃຫ້ເກີດດອກອອກຜົນໃນອະນາຄົດ, ຊຸກຍູ້ສົ່ງເສີມຄູ-ອາຈານຜູ້ທີ່ມີເງື່ອນໄຂຂໍຕຳແໜ່ງວິຊາການ ຍົກວຸດທິໃຫ້ຫຼາຍຂຶ້ນ, ສືບຕໍ່ຮ່ວມມືກັບບັນດາສະຖານບັນ ແລະ ພາກສ່ວນຕ່າງໆພາຍໃນ ແລະ ຕ່າງປະເທດ. ພ້ອມທັງກ່າວລາໜ້າທີ່ ແລະ ເຊັນບົດບັນທຶກການມອບ-ຮັບໜ້າທີ່ວຽກງານ.

ໂອກາດດັ່ງກ່າວ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາໄດ້ກ່າວສະແດງຄວາມຍ້ອງຍໍຜົນງານອັນພົ້ນເດັ່ນຂອງວິທະຍາໄລຄູຫຼວງພະບາງ, ພ້ອມທັງເນັ້ນໜັກໃຫ້ຜູ້ຮັບໜ້າທີ່ດຳລົງຕໍາແໜ່ງໃໝ່ສືບຕໍ່ປັບປຸງແຜນການຮຽນ-ການສອນ ສ້າງຊັບພະຍາກອນມະນຸດ, ຫຼັກການຮຽນ-ການສອນຕ້ອງຮັບປະກັນທາງດ້ານປະລິມານ ແລະ ຄຸນນະພາບ, ການເປັນຄູຕົວແບບ, ວຽກງານບໍລິຫານ, ວຽກງານບຸກຄະລາກອນ ການປະສານງານສາຍຕັ້ງສາຍຂວາງ ແລະ ຂະແໜງການທີ່ກ່ຽວຂ້ອງຕາມຫຼັກສູດຂອງກະຊວງສຶກສາທິການ ແລະ ກິລາວາງອອກໃຫ້ໄດ້ຮັບຜົນດີ.