ພິທີເປີດການແຂ່ງຂັນກິລານັກສຶກສາວິທະຍາໄລຄູຫຼວງພະບາງ ປະຈໍາສົກຮຽນ 2019-2020

ພິ​ທີເປີດໄດ້ໄຂຂຶ້ນຢ່າງເປັນທາງການໃນຕອນ​ແລງຂອງວັນທີ 30 ຕຸລາ 2019 , ທີ່ສະໜາມກິລາບານ​ເຕະ​ຂອງສະ​ຖາ​ບັນ ໂດຍການເປັນປະທານຂອງທ່ານ ທອງຫຼໍ່ ຄຸນ​ສະ​ຫວັດ ​ຮອງຜູ້ອຳນວຍການວິ​ທະ​ຍາ​ໄລ​ຄູ​ລວງ​ພະ​ບາງ ຝ່າຍ​ກິດ​ຈະ​ການ​ນັກ​ນັກ​ສາ, ມີທ່ານ ຫຸມ​ພັນ ຄອນ​ສະ​ຫວັດ ​ຮອງຜູ້ອຳນວຍການວິ​ທະ​ຍາ​ໄລ​ຄູ​ລວງ​ພະ​ບາງ​ຝ່າຍ​ວິ​ຊາ​ການ ຕະຫຼວດຮອດຄູ-ອາຈານ ແລະ ນັກ​ສຶກ​ສາເຂົ້າຮ່ວມຢ່າງພ້ອມພຽງ.ໃນພິທີໄດ້ຮັບຟັງການລາຍງານຜົນງານທີ່ຈັດຕັ້ງປະຕິບັດໃນສົກຮຽນທີ່ຜ່ານມາ ເວົ້າລວມ ເວົ້າສະເພາະແມ່ນດ້ານວຽກງານກິລາ  ເຊິ່ງມີຫຼາຍດ້ານທີ່ພົ້ນເດັ່ນໂດຍສະເພາະແມ່ນການສົ່ງນັກກິລາປະກອບສ່ວນເຂົ້າໃນວຽກງານທີ່ທາງຂັ້ນເທິງມອບ ໝາຍໃຫ້ຈົນໄດ້ຮັບຜົນສຳເລັດຢ່າງໜ້າເພິ່ງພໍໃຈ ແລະ ທິດທາງແຜນການ ເຄື່ອນໄຫວວຽກງານກິລາ  ປະຈຳສົກຮຽນ 2018-2019.

ຈາກນັ້ນກໍ່ໄດ້ຮັບຟັງການໂອ້ລົມຈາກຄະ​ນະ​ປະ​ທານ ເຊິ່ງກ່ອນອື່ນ ທ່ານກໍ່ໄດ້ຍ້ອງຍໍຕໍ່ຜົນງານ ແລະ ໄຊຊະນະຕ່າງໆທີ່ທາງ​ນັກ​ກິ​ລາ​ຂອງ​ສະ​ຖາ​ບັນຍາດມາໄດ້ ກໍ່ຄືຄວາມສໍາຄັນຂອງການເປີດງານໃນຄັ້ງນີ້, ເຊິ່ງທ່ານໄດ້ ເນັ້ນໜັກບາງບັນຫາ ເປັນຕົ້ນແມ່ນການແຂ່ງຂັນຕ້ອງຮັບປະກັນທາງດ້ານລະບຽບວິໄນ, ແຂ່ງຂັນດ້ວຍໄມຕີຈິດມິດຕະພາບ, ສ້າງຄວາມຮັກແພງສາມັກຄີກັນເສີມສ້າງສາຍສຳພັນທີ່ດີເພື່ອເຝຶກໃຫ້ນັກຮຽນມີນ້ຳໃຈນັກກິລາ, ປະກອບສ່ວນຢ່າງຕັ້ງໜ້າເຂົ້າໃນຂະບວນການຂອງຂັ້ນເທິງ, ເພື່ອສຸຂະພາບ ແລະ ຫ່າງໄກຈາກຢາເສບຕິດ ຈາກນັ້ນປະທານພິທີ ກໍ່ໄດ້ກ່າວເປີດພິທີຢ່າງເປັນທາງການ . ກິລາທີ່ນໍາມາແຂ່ງຂັນໃນຄັ້ງນິ້ປະກອບມີ 4 ປະເພດກິລາເຊັນ: ບານເຕະ (ຍິງ-ຊາຍ) , ບານສົ່ງ (ຍິງ-ຊາຍ) , ເປຕັງ (ຍິງ-ຊາຍ) , ກະ​ຕໍ້ (ຍິງ-ຊາຍ) ​ໂດຍ​ປະ​ກອບ​ມີ 9 ສາ​ຂາ​ວິ​ຊາ​ສະ​ເພາະ​ເຂົ້າ​ຮ່ວມ​ການ​ແຂ່ງ​ຂັນ ໂດຍ​ມີ​ສາ​ຍຄູ​ພູມສາດ ລະບົບຕໍ່ເນື່ອງ, ສາຍຄູພາສາອັງກິດ, ສາຍຄູ ພາສາຝຣັ່ງ, ສາຍຄູເຄ​ມີ​ສາດ, ອຟີ​ຊິກ​ສາດ, ສາຍຄູຊີ​ວະ​ສາດ, ສາຍຄູ ICT -ພື້ນ​ຖານ​ວິ​ຊາ​ຊີບ, ສາຍຄູອະ​ນຸ​ບານ, ສາຍຄູປະ​ຖົມ. ໄລຍະດຳເນີນການແຂ່ງຂັນ ແຕ່ຕົ້ນເດື່ອນກາງເດືອນຕຸລາ ຫາ​ວັ​ນ​ທີ່ 29 ພະ​ຈິກ 2019 ຈິ່ງຈະສຳເລັດ .

ໃນພິທີຍັງໄດ້ຮັບຊົມການສະແດງ​ ສິລະປະວັນນະຄະດີບົດຟ້ອນຕ່າງໆຈາກນັກ​ສຶກ​ສາ ດ້ວຍບັນຍາກາດເບີກບານມ່ວນຊື່ນ.

ຂ່າວ​ສານ​ໂດຍ: ຜູ້​ຊ່ວຍ​ອາ​ຈານ ປະ​ນົມ​ພອນ ຄອນ​ສະ​ຫວັດ

ພາບໂດຍ: ປ.ຕີ ບົວວັນ ພັນທະນິດ

ໜ່ວຍ​ງານ​ຂໍ້​ມູນ​ຂ່າວ​ສານ