ພິທີແລກປ່ຽນບົດຮຽນກ່ຽວກັບການເຝິກຫັດວິຊາຊີບ, ວຽກງານວິໄຈ ແລະ ການຈັດການຮຽນ-ການສອນ ລະຫວ່າງວິທະຍາໄລຄູຫລວງພະບາງ ແລະ ວິທະຍາໄລຄູດົງຄຳຊ້າງ   ຄັ້ງວັນທີ 10 ມີນາ 2020

ໃນຕອນເຊົ້າຂອງວັນທີ 10 ມີນາ 2020 ເວລາ 8:00 ໂມງ ໄດ້ມີພິທີຕ້ອນຮັບຄູ-ອາຈານ ຈາກວິທະຍາໄລຄູດົງຄຳຊ້າງ ໄດ້ຈັດຂຶ້ນທີ່ຫ້ອງປະຊຸມຕຶກ 3 ຊັ້ນ ວິທະຍາໄລຄູຫລວງພະບາງ ໂດຍການຕ້ອນຮັບຂອງ ທ່ານ ຫຸມພັນ ຄອນສະຫວັດ ຄະນະອຳນວຍການວິທະຍາໄລຄູຫລວງພະບາງ, ທ່ານ ຫົງຄຳ ບຸດດວງທິບ ຫົວໜ້າຫ້ອງການສົ່ງເສີມວິຊາການ ພ້ອມດ້ວຍບັນດາຫົວໜ້າຫ້ອງການ ແລະ ຄູ-ອາຈານພາຍໃນວິທະຍາໄລຄູຫລວງພະບາງ. ໃນພິທີໄດ້ເລີ່ມຕົ້ນດ້ວຍການກ່າວເປີດພິທີຕ້ອນຮັບຢ່າງເປັນທາງການຂອງທ່ານ ຫຸມພັນ ຄອນສະຫວັດ ຄະນະອຳນວຍການວິທະຍາໄລຄູຫລວງພະບາງ ແລະ ກ່າວສະແດງຄວາມຍິນດີຂອງ ທ່ານ ບຸນເລີດ ສິງລັດຕະນະ ຄະນະອຳນວຍການວິທະຍາໄລຄູດົງຄຳຊ້າງ ທີ່ໄດ້ມາແລກປ່ຽນບົດຮຽນກັບວິທະຍາໄລຄູຫລວງພະບາງໃນຄັ້ງນີ້. ຈາກນັ້ນ ທ່ານ ອຈ ໂພທິສັກ ວົງສີ ຮອງຫົວໜ້າຫ້ອງການສົ່ງເສີມວິຊາການ ກໍໄດ້ກ່າວຈຸດປະສົງວາລະກອງປະຊຸມ ພ້ອມດ້ວຍການແນະນຳບັນດາຄູ-ອາຈານ ແລະ ໜ້າທີ່ຮັບຜິດຊອບຂອງທັງສອງສະຖາບັນ. ເຂົ້າຮ່ວມພິທີແລກປ່ຽນທັງສອງສະຖາບັນຄັ້ງນີ້ ມີຄູ-ອາຈານຈາກວິທະຍາໄລຄູດົງຄຳຊ້າງ ເຂົ້າຮ່ວມ 31 ທ່ານ ແລະ ວິທະຍາໄລຄູຫລວງພະບາງເຂົ້າຮ່ວມ 53 ທ່ານ ລວມທັງໝົດ 84 ທ່ານ. ການພົບປະແລກປ່ຽນຖອດຖອນບົດຮຽນ ທ່ານ ຫົງຄຳ ບຸດດວງທິບ ຫົວໜ້າຫ້ອງການສົ່ງເສີມວິຊາການ ໄດ້ຜ່ານວຽກງານດ້ານວິຊາການ ການເຝິກຫັດວິຊາຊີບ, ການວິໄຈ ແລະ ອື່ນໆ. ໃນການແລກປ່ຽນບົດຮຽນ ໄດ້ນຳເອົາບົດຮຽນອັນສຳຄັນ ໃນການຈັດຕັ້ງປະຕິບັດ ແລະ ການກໍ່ສ້າງຄູ ເພື່ອໄປພັດທະນາການຮຽນ-ການສອນຂອງທັງສອງສະຖາບັນໃຫ້ເຂັ້ມແຂງ ແລະ ກ້າວໄປສູ່ສາກົນ. ບັນດາຄະນະອຳນວຍການຂອງທັງສອງສະຖາບັນ ໄດ້ແຈ້ງໃຫ້ກັນຊາບກ່ຽວກັບສະພາບບັນຫາການຮຽນ-ການສອນທັງສອງສະຖາບັນ. ຫລັງຈາກນັ້ນ ໄດ້ນຳພາບັນດາຄູ-ອາຈານ ຈາກວິທະຍາໄລຄູດົງຄຳຊ້າງ ທ່ຽວຊົມສະຖານທີ່ທ່ອງທ່ຽວ ພາຍໃນຕົວເມືອງຫລວງພະບາງ. ເວລາ 15:00 ໂມງ ໄດ້ມີການແຂ່ງຂັນກິລາເພື່ອແລກປ່ຽນຄວາມສາມັກຄີ. ຕີລາຄາລະຫວ່າງການຖອດຖອນບົດຮຽນຜ່ານມາ ແລະ ການປຶກສາຫາລືການຮຽນ-ການສອນໃນຕໍ່ໜ້າໃຫ້ກ້າວໄປເຖິງຈຸດສູງສຸດຂອງແຕ່ລະສະຖາບັນ. ຄະນະອຳນວຍການຂອງທັງສອງສະຖາບັນໄດ້ກ່າວຂອບໃຈເຊິ່ງກັນແລະກັນໃນການມາແລກປ່ຽນບົດຮຽນໃນຄັ້ງນີ້.

ຂ່າວສານໂດຍ: ປຕ ສຸລິຈັນ ສຸກສະຫວັດ

ພາບໂດຍ : ປທ ວິລະກອນ ແກ້ວພົມມະວົງ