ວິທະຍາໄລຄູຫຼວງພະບາງຮັບໃບຢັ້ງຢືນ ເປັນສູນແຫ່ງການພັດທະນາສາຍຄູ ຟີຊິກສາດ ແລະ ຊີວະສາດ

ໃນ​ວັນ​ທີ 13 ມິ​ຖຸ​ນາ 2019 ​ຜ່ານ​ມາ​ນີ້ຢູ່ທີ່ຫ້ອງປະຊຸມຂອງວິ​ທະ​ຍາ​ໄລ​ຄູຫຼວງ​ພະ​ບາງ ໄດ້ຈັດພິທີຮັບ​ໃບ​ຢັ້ງຢືນເປັນ​ສູນ​ແຫ່ງ​ການ​ພັດ​ທະ​ນາ​ສາຍ​ຄູ​ຟີ​ຊິກ​ສາດ ແລະ ຊີ​ວະ​ສາດ, ​ໂດຍການ​ເປັນ​ປະທານ​ຮ່ວມຂອງ ທ່ານ ເອີງ ລໍ​ສະ​ຫວັນ ກຳ​ມະ​ການ​ພັກ​ແຂງ ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາແຂວງຫຼວງ​ພະ​ບາງ, ​ທ່ານ ບຸນ​ສຸ​ວັນ ລັດ​ຕະ​ນາ ​ຜູ້​ອຳ​ນວຍ​ການວິ​ທະ​ຍາ​ໄລ​ຄູຫຼວງ​ພະ​ບາງ, ​ມີ​ທ່ານ ເພັດ​ມະ​ນີ ສີ​ລັດ​ມີ​ນາ ຮອງ​ພະ​ແນກກວດ​ກາ ຕິດ​ຕາມ ປະ​ເມີນ ກົມ​ສ້າງ​ຄູ ພ້ອມແຂກຖືກເຊີນ, ຄູ-ອາ​ຈານ ແລະ ນັກ​ສຶກ​ສາເຂົ້າຮ່ວມຢ່າງພ້ອມພຽງ.ໂດຍ​ປະ​ຕິ​ບັດ​ຕາມ​ມະ​ຕິ​ຂອງກອງ​ປະ​ຊຸມ​ຜູ້​ບໍ​ລິ​ຫານ​ສະ​ຖາ​ບັນ​ສ້າງ​ຄູ ຄັ້ງ​ທີ 21 ທີ່​ວິ​ທະ​ຍາ​ໄລ​ຄູຫຼວງ​ນ້ຳ​ທາ​ໃນ​ການມອບ​ໝາຍ​ໃຫ້​ແຕ່​ລະ​ວິ​ທະ​ຍາ​ໄລ​ຄູ​ໄດ້​ສ້າງ​ສູນ​ແຫ່ງ​ການ​ພັດ​ທະ​ນາ ແລະ ສູນ​ແຫ່ງ​ຄວາມ​ເປັນ​ເລີດນັ້ນ. ວິ​ທະ​ຍາ​ໄລ​ຄູຫຼວງ​ພະ​ບາງ​ໄດ້​ດຳ​ເນີນ​ການ​ຜັນ​ຂະ​ຫ​ຍາຍ, ປັບ​ປຸງ​ຂະ​ບວນ​ການບວກ​ໃສ່​ທາ​ແຮງ​ທີ່​ມີ​ຢູ່​ໂດຍ​ສົ​ມທົບ​ກັບວິ​ທະ​ຍາ​ໄລ​ຄູ​ແຫ່ງ​ຕ່າງໆ​ໃນ​ທົ່ວ​ປະ​ເທດ ແລະ ຕ່າງ​ປະ​ເທດ, ວິ​ທະ​ຍາ​ໄລ​ຄູຫຼວງ​ພະ​ບາງ​ຈຶງ​ໄດ້​ຮັບ​ຮອງ​ຈາກ​ກົມ​ສ້າງ​ຄູ ກະ​ຊວງ​ສຶກ​ສາ​ທິ​ການ ແລະ ກິ​ລາ ໃຫ້​ກາຍ​ເປັນ​ສູນ​ແຫ່ງ​ການ​ພັດ​ທະ​ນາ​ໃນ​ສາຍ​ຄູ​ຟີ​ຊິກ​ສາດ ແລະ ຊີ​ວະ​ສາດ ເຊິ່ງ​ໃນ​ວັນ​ທີ່ 13 ມິ​ຖຸ​ນາ 2019 ວິ​ທະ​ຍາ​ໄລ​ຄູຫຼວງ​ພະ​ບາງ ຈຶ່ງ​ໄດ້​ຈັດ​ພິ​ທີ​ເປີດ​ປ້າຍ ສູນ​ແຫ່ງ​ການ​ພັດ​ທະ​ນາ​ໃນ​ສາຍ​ຄູ​ຟີ​ຊິກ​ສາດ ແລະ ຊີ​ວະ​ສາດ ຂື້ນ​ຢ່າງ​ເປັນ​ທາງ​ການ. ຈາກນັ້ນ ທ່ານ ອ​ຈ ປ.ໂທ ຫຸມ​ພັນ ຄອນ​ສະ​ຫວັດ ຮອງ​ຜູ້​ອຳ​ນວຍ​ການ​ວິ​ທະ​ຍາ​ໄລ​ຄູຫຼວງ​ພະ​ບາງ ໄດ້​ຂື້ນ​ຜ່ານ​ບົດ​ສະຫຼຸບ​ການ​ສ້າງ​ສູນ​ແຫ່ງ​ການ​ພັດ​ທະ​ນາ ແລະ ທິດ​ທາງ​ໃນ​ຕໍ່​ໜ້າ.ຫຼັງ​ຈາກນັ້ນ ທ່ານ ເພັດ​ມະ​ນີ ສີ​ລັດ​ມີ​ນາ ຮອງ​ພະ​ແນກກວດ​ກາ ຕິດ​ຕາມ ປະ​ເມີນ ກົມ​ສ້າງ​ຄູ ກໍ​ໄດ້​ຂື້ນ​ຜ່ານ​ຂໍ້​ຕົກ​ລົງ​ຂອງ​ລັດ​ຖະ​ມົນ​ຕີ​ວ່າ​ດ້ວຍ​ການ​ຮັບ​ຮອ​ງ​ໃຫ້ວິ​ທະ​ຍາ​ໄລ​ຄູຫຼວງ​ພະ​ບາງເປັນສູນ​ແຫ່ງ​ການ​ພັດ​ທະ​ນາ​ໃນ​ສາຍ​ຄູ​ຟີ​ຊິກ​ສາດ ແລະ ຊີ​ວະ​ສາດ. ພິ​ທີ​ມອບ​ໃບ​ຢັ້ງ​ຢືນ​ໃຫ້​ກຽດ​ມອບ​ໂດຍ ທ່ານ ເອີງ ລໍ​ສະ​ຫວັນ ກຳ​ມະ​ການ​ພັກ​ແຂງ ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາແຂວງຫຼວງ​ພະ​ບາງ ພ້ອມ​ທັງ​ໃຫ້​ຄຳ​ຄິດ​ຄຳ​ເຫັນ​ຕໍ່​ການ​ພັດ​ທະ​ນາ​ການ​ສຶກ​ສາ​ພາຍ​ໃນ​ວິ​ທະ​ຍາ​ໄລ​ຄູ​ໃຫ້​ພັດ​ທະ​ນາ​ຂື້ນ​ໄປ​ຢ່າງ​ກ້າວ​ໜ້າ. ພ້ອມ​ທັງ​ຖ່າຍ​ພາບ​ລວມ​ຮ່ວມ​ກັບ​ບັນ​ດາ​ຄະ​ນະ​ນຳ​ຂອງວິ​ທະ​ຍາ​ໄລ​ຄູຫຼວງ​ພະ​ບາງ, ແຂກ​ຖືກ​ເຊີນ, ຄູ-ອາ​ຈານ ແລະ ນັກ​ສຶກ​ສາ​ທີ່​ປ້າຍສູນ​ແຫ່ງ​ການ​ພັດ​ທະ​ນາ​ໃນ​ສາຍ​ຄູ​ຟີ​ຊິກ​ສາດ ແລະ ຊີ​ວະ​ສາດ.

ຂ່າວ​ສານ​ໂດຍ: ທ່ານ ຊອ ປ​.ຕີ ປະ​ນົມ​ພອນ ຄອນ​ສະ​ຫວັດ

ໜ່ວຍ​ງານ​ຂໍ້​ມູນ​ຂ່າວ​ສານ.