ວິທະຍາໄລຄູຫຼວງພະບາງ ສ້າງຂະບວນການອອກແຮງງາມລວມ  ເພື່ອກຽມເປີດຮຽນຄືນໃໝ່ ແລະ ກະກຽມຕ້ອນຮັບການປະກາດເລື່ອນຂຶ້ນຮັບຕໍາແໜ່ງຜູ່ອຳນວຍການ ແລະ ຮອງອຳນວຍການ ວິທະຍາໄລຄູຫຼວງພະບາງ

ໃນຕອນບ່າຍຂອງວັນທີ 10 ມີຖຸນາ 2020 ຄູ-ອາຈານ, ນັກສຶກສາວິທະຍາໄລຄູຫຼວງ ໄດ້ພ້ອມພຽງກັນອອກແຮງສ້າງຂະບວນການເພື່ອກຽມເປີດຮຽນຄືນໃໝ່ ແລະ ການປະກາດເລື່ອນຂຶ້ນຮັບຕໍາ ແໜ່ງ ຜູ່ອຳນວຍການ ແລະ ຮອງຜູ່ອຳນວຍການ ຂອງວິທະຍາໄລຄູຫລວງພະບາງ ທີ່ຈະໄດ້ຈັດຂຶ້ນໃນມື້ວັນທີ 11 ມີຖຸນາ 2020 ທີ່ຈະມາເຖິງນີ້.

ໃນການສ້າງຂະບວນການອອກແຮງລວມໃນຄັ້ງນີ້ ມີຄູ-ອາຈານ ແລະ ນັກສຶກສາເຂົ້າຮ່ວມທັງໝົດ 109 ຄົນ, ຍິງ 85 ຄົນ, ຄູ-ອາຈານທັງໝົດມີ 59 ທ່ານ, ຍິງ36 ທ່ານ ແລະ ນັກສຶກສາ ມີຈໍານວນ 50 ຄົນ ຍິງ 28 ຄົນ. ເພື່ອເປັນການ ຮັກສາຄວາມສະອາດ ສວຍງາມ, ປ້ອງກັນເຊື້ອໂລກ, ປ້ອງກັນພະຍາດໄຂ້ຍຸງລາຍ ໃນຊ່ວງໜ້າຝົນ, ໃນທ່າມກາງອາກາດຮ້ອນເອົ້າ ແຕ່ຄູອາຈານ ແລະນັກສຶກສາພວກເຮົາກໍໄດ້ຕັ້ງໜ້າເອົາໃຈໃສ່ ອະນາໄມ ອາຄານສະຖານທີ່, ຫ້ອງຮຽນ, ຫ້ອງການ, ຫໍພັກ, ຫໍສະໝຸດ, ຫ້ອງຄອມພິວເຕີ ເດີ່ນຫຍ້າໃນບໍລິເວນອ້ອມຮອບໂຮງຮຽນ ໃຫ້ສວຍງາມ ດັ່ງວິໄສທັດທີ່ວ່າ ວິທະຍາໄລຄູຫຼວງພະບາງ ສ້າງວິຊາຊີບຄູສູ່ຄວາມເປັນເລີດ ປະເສີດດ້ວຍຄຸນນະທຳ ສົ່ງເສີມວັດທະນະທຳທີ່ເປັນເອກະລັກ ພັດທະນາສິ່ງແວດລ້ອມ ສ້າງຄວາມພ້ອມກ້າວສູ່ສາກົນ.

ຂ່າວສານໂດຍ ປ.ຕ ສຸລິຈັນ ສຸກສະຫວັດ

ພາບໂດຍ: ປ.ຕ ສຸລິຈັນ ສຸກສະຫວັດ

ໜ່ວຍງານຂໍ້ມູນຂ່າວສານ ຫ້ອງການວັດ-ປະເມີນຜົນ ວິທະຍາໄລຄູຫຼວງພະບາງ