ວິທະຍາໄລຄູຫຼວງພະບາງອອກແຮງງານ ວັນເສົາແດງ ສ້າງຂະບວນການຕ້ອນຮັບ ວັນສ້າງຕັ້ງ ສະຫະພັນແມ່ຍິງລາວ ຄົບຮອບ 65 ປີ

ເມື່ອຕອນເຊົ້າຂອງວັນທີ 18 ກໍລະກົດ 2020 ນີ້ ຄະນະຄູ-ອາຈານ, ພະນັກງານ ແລະ ນັກສຶກສາ ພາຍໃນວິທະຍາໄລຄູຫຼວງພະບາງ ໄດ້ພາກັນອອກແຮງງານວັນເສົາແດງ ເພື່ອສ້າງຂະບວນການຕ້ອນຮັບວັນສ້າງຕັ້ງ ສະຫະພັນແມ່ຍິງລາວຄົບຮອບ 65 ປີ ນຳພາຂະບວນການອອກແຮງງານໃນຄັ້ງນີ້ມີ ສະຫາຍ ປອ ອານຸສິດ ມະໂນສານ ຄະນະອຳນວຍການວິທະຍາໄລຄູຫຼວງພະບາງ ພ້ອມດ້ວຍຄະນະ. ໃນຂະບວນການອອກແຮງງານໃນຄັ້ງນີ້ ມີຜູ້ເຂົ້າຮ່ວມທັງໝົດ 1.098 ຄົນ, ຍິງ 720 ຄົນ.

ສຳລັບການອອກແຮງງານວັນເສົາແດງຄັ້ງນີ້ ຄະນະຄູ-ອາຈານ ແລະ ນັກສຶກສາພາຍໃນວິທະຍາໄລຄູຫຼວງພະບາງ ໄດ້ພາກັນອະນາໄມ, ປັດກວາດ, ຖາງຫຍ້າ, ຕອນຕົ້ນໄມ້ ໃນບໍລິເວນເດີ່ນວິທະຍາໄລຄູຫຼວງພະບາງ ໃຫ້ມີຄວາມສະອາດງາມຕາ ແລ້ວຍັງໄດ້ຖາງຫຍ້າ ແລະ ເກັບຂີ້ເຫຍື້ອຕາມເສັ້ນທາງອ້ອມຮອບວິທະຍາໄລຄູຫຼວງພະບາງ ໃຫ້ມີຄວາມສະອາດງາມຕາ ຕາມທິດຊີ້ນຳຂອງຄະນະພັກ ຄະນະອຳນວຍການ ກຽມໃສ່ບັ້ນເປີດກອງປະຊຸມຜູ້ບໍລິຫານການສຶກສາທົ່ວປະເທດ ທີ່ຈະໄດ້ຈັດຂຶ້ນທີ່ວິທະຍາໄລຄູຫຼວງພະບາງ.

ຂ່າວສານໂດຍ: ປຕ ສຸລິຈັນ ສຸກສະຫວັດ

ຖ່າຍພາບໂດຍ: ປຕ ສຸລິຈັນ ສຸກສະຫວັດ