ສະຫະພັນກຳມະບານວິທະຍາໄລຄູຫຼວງພະບາງ ຈັດພິທີປາຖະກະຖາ ວັນສ້າງຕັ້ງກໍາມະບານລາວ ຄົບຮອບ 63 ປີ

ຕອນ​ບ່າຍຂອງວັນທີ່ 13 ກຸມ​ພາ 2019ນີ້,ຢູ່ທີ່ສະໂມສອນວິ​ທະ​ຍາ​ໄລ​ຄູຫຼວງພະບາງໄດ້ຈັດພິທີ ປາຖະກາຖາ ວັນສ້າງຕັ້ງກໍາມະບານລາວ ຄົບຮອບ 63 ປີ. ​ໃຫ້​ກຽດ​ເຂົ້າ​ຮ່ວມ​ໃນ​ພິ​ທີ​ດັ່ງ​ກ່າວ​ມີ ທ່ານ ທອງຫຼໍ່ ຄຸນ​ສະ​ຫວັດ ຄະ​ນະ​ພັກ​ຮາກ​ຖານ​ວິ​ທະ​ຍາ​ໄລ​ຄູຫຼວງ​ພະ​ບາງ, ມີ​ຄະ​ນະ​ບໍ​ລິ​ຫານ​ງານ​ກຳ​ມະ​ບານ 5 ຮາກ​ຖານ​ອ້ອມ​ຂ້າງ ແລະ ສະ​ມາ​ຊິກ​ກຳ​ມະ​ບານ​ທີ່​ເປັນ​ຄູ-ອາ​ຈານ, ພະ​ນັກ​ງານ ແລະ ຕົວ​ແທນ​ສະ​ມາ​ຊິກ​ກຳ​ມະ​ບານ​ທີ່​ເປັນ​ນັກ​ສຶກ​ສາ.ຈຸດ​ປະ​ສົງ​ຂອງ​ການ​ປາ​ຖະ​ກາ​ຖາ ແມ່ນ​ເພື່ອ​ຮັບ​ຟັງ​ການ​ເລົ່າ​ມູນ​ເຊື້ອ, ສະ​ເຫຼີມ​ສະຫຼອງວັນ​ສ້າງ​ຕັ້ງ​ກຳ​ມະ​ບານ​ລາວ​ ຄົບ​ຮອບ 63 ປີ ເພື່ອ​ເຮັດ​ໃຫ້​ສະ​ມາ​ຊິກ​ກຳ​ມະ​ບານ, ກຳ​ມະ​ກອນ​ຊາວ​ຜູ້​ອອກ​ແຮງ​ງານ​ລາວ​ບັນ​ດາ​ເຜົ່າ ຮູ້​ເຖີງ​ຄວາມ​ໝາຍ, ຄວາມ​ສຳ​ຄັນ​ຂອງ​ອົງ​ການ​ຈັດ​ຕັ້ງ​ສະ​ຫະ​ພັນ​ກຳ​ມະ​ບານ​ລາວ ແລະ ມູນ​ເຊື້ອ​ໃນ​ການ​ປະ​ກອບ​ສ່ວນ​ປົກ​ປັກ​ຮັກ​ສາ ແລະ ພັດ​ທະ​ນາ​ປະ​ເທດ​ຊາດ ກໍ​ຄື​ພາ​ລະ​ກິດ​ປ່ຽນ​ແປງ​ໃໝ່​ຢ່າງ​ຮອບ​ດ້ານ ແລະ ມີ​ຫລັກ​ການຂອງ​ພັກ​ເຮົາ. ພິ​ທີ​ດັ່ງ​ກ່າວ ທ່ານ ສາຍ​ທອງ ແກ້ວ​ມະ​ນີ​ທ່ຽງ ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ກຳ​ມະ​ບານ​ແຂວງ ປະ​ທານ​ສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູຫຼວງ​ພະ​ບາງ ໄດ້ໃຫ້ກຽດປາຖະກາຖາເລົ່າມູນເຊື້ອ ວັນສ້າງຕັ້ງສະຫະພັນກໍາມະບານລາວ (1 ກຸມພາ 1956 – 1 ກຸມພາ 2019) ຄົບຮອບ 63 ປີ ເຊີ່ງທ່ານໄດ້ຍົກໃຫ້ເຫັນການກໍາເນີດ ແລະ ເຕີບໃຫ່ຍຂະຫຍາຍຕົວຂອງອົງການຈັດຕັ້ງກໍາມະບານລາວ,ທີ່ມີມູນເຊື້ອດຸໝັ່ນຂະຫັຍນພຽນໃນການອອກແຮງງານ,ມູນເຊື້ອສາມັກຄີປອງດອງ,ມູນເຊື້ອວັດທະນະທໍາທີ່ເປັນເອກະລັກອັນດີງາມ ແລະ ອັນທີ່ພົ້ນເດັ່ນກວ່າ​ໝູ່ແມ່ນມູນເຊື້ອແຫ່ງການຕໍ່ສູ້ບໍ່ຍອມຈໍານົນຕ້ານການຮຸກຮານຂອງພວກສັດຕູຢ່າງເດັດດ່ຽວໜຽວແໜ້ນຂອງບັນດາບັນພະບູລຸດ,ຊົນຊັ້ນກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າໃນການທ້ອນໂຮມ,ປົກປັກຮັກສາ ແລະ ສ້າງສາປະເທດຊາດ,ເພື່ອຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າໃນແຕ່ລະຍຸກສະໄໜ ສຶບທອດກັນມາຈົນເຖິງປະຈຸບັນ,ຜົນງານທີ່ພົ້ນເດັ່ນໃນການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານສູນກາງສະຫະພັນກໍາມະບານລາວຄັ້ງທີ 3 ແລະ ກອງປະຊຸມກາງສະໄໜຄົບຄະນະບໍລິຫານງານສະຫະພັນກໍາມະບານລາວຄັ້ງທີ່ 4 ສະໄໜທີ່ 7,ຜົນງານທີ່ພົ້ນເດັ່ນໄລຍະ 63 ປີຂອງອົງການຈັດຕັ້ງກໍາມະບານລາວໃນການປະກອບສ່ວນພາລະກິດປະຕິວັດ,ໄລຍະແຫ່ງການປົກປັກຮັກສາ ແລະ ພັດທະນາປະເທດຊາດ,ວຽກງານປົກປ້ອງສິດ ແລະ ຜົນປະໂຫຍດອັນຊອບທໍາຂອງກໍາມະກອນ ແລະ ຊາວຜູ້ອອກແຮງງານ,ການປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ,ການປຸກລະດົມ ແລະ ຂະຫຍາຍກອງທືນຊ່ວຍເຫຼືອຊຶ່ງກັນ ແລະ ກັນ,ເສີມຂະຫາຍທາດແທ້,ລັກສະນະດີເລີດຂອງຊົນຊັ້ນກໍາມະກອນລາວ ແລະ ມູນເຊື້ອອັນດີງາມ 63 ປີຂອງອົງການກໍາມະບານລາວ.

ຂ່າວ​ສານ​ໂດຍ: ຜູ້​ຊ່ວຍ​ອາ​ຈານ ປະ​ນົມ​ພອນ ຄອນ​ສະ​ຫວັດ

ໜ່ວຍ​ງານ​ຂໍ້​ມູນ​ຂ່າວ​ສານ