ວິທະຍາໄລຄູຫຼວງພະບາງຝຶກອົບຮົມ ວຽກງານເຍົາວະຊົນ-ອານຸຊົນທັນວາ ໃຫ້ນັກສຶກສາປີສຸດທ້າຍ

ວັນທີ່ 29 ພຶດສະພາ 2018 ນີ້ ຢູ່ທີ່ສະໂມສອນວິທະຍາໄລຄູຫຼວງພະບາງ ໄດ້ຈັດຊຸດຝຶກອົບຮົມວຽກງານເຍົາວະຊົນທັນວາ ໃຫ້ນັກສຶກສາປີສຸດທ້າຍ ໂດຍການເປັນປະທານຂອງສະຫາຍ ອຸ່ນຄຳ ສຸວັນນະພັນ ເລຂາຄະນະບໍລິຫານງານຊາວໜຸ່ມແຂວງ ສະຫາຍ ທອງຫຼໍ່ ຄຸນສະຫວັດ ຄະນະໜ່ວຍພັກ ຮອງອຳນວຍການວິທະຍາໄລຄູຫຼວງພະບາງ, ມີສະຫາຍ ບຸນທຽມ ແກ້ວວົງລັດ ຮອງເລຂາໜ່ວຍຊາວຫນຸ່ມ, ຄູ-ອາຈານ ແລະ ແຂກຖືກເຊີນພ້ອມດ້ວຍນັກສຶກສາເຂົ້າຮ່ວມທັງໝົດ 73 ສະຫາຍ, ຍິງ 55 ສະຫາຍ. ພິທີສະຫາຍ ອຸ່ນຄຳ ສຸວັນນະພັນ ເລຂາຄະນະບໍລິຫານງານຊາວໜຸ່ມແຂວງ ໄດ້ກ່າວເປີດຢ່າງເປັນທາງການ ແລະ ກໍ່ໄດ້ຮຽກຮ້ອງໃຫ້ຜູ້ເຂົ້າຮ່ວມຊຸດອົບຮົມຄັ້ງນີ້ ມີຄວາມເອົາໃຈໃສ່ໃນການຝຶກອົບຮົມທາງດ້ານທິດສະດີ ແລະ ການປະຕິບັດຕົວຈິງ, ເພື່ອໃຫ້ໄດ້ຮັບຮູ້, ເຂົ້າໃຈ ແລະ ນຳເອົາບົດຮຽນທີ່ໄດ້ຮຽນມານຳໄປພັດທະນາເດັກນ້ອຍເຍົາວະຊົນ-ອານຸຊົນໃຫ້ມີຄວາມກ້າວໜ້າ.ພ້ອມດຽວກັນນັ້ນ ສະຫາຍ ບຸນຈັນ ປານຟອງເພັດ ຮອງເລຂາຄະນະບໍລິຫານງານຊາວໜຸ່ມແຂວງ ຜູ່ຮັບຜິດຊອບວຽກງານເຍົາວະຊົນ-ອານຸຊົນທັນວາ ກໍ່ໄດ້ຂື້ນເລົ່າມູນເຊື້ອ ແລະ ປະຫວັດຫຍໍ້ໃນການສ້າງຕັ້ງກອງເຍົາວະຊົນທັນວາ, ເພື່ອໃຫ້ນັກສຶກສາມີຄວາມຮັບຮູ້ເຂົ້າໃຈໃນການເຄື່ອນໄຫວວຽກງານເຍົາວະຊົນທັນວາ, ໃນນັ້ນມີພິທີການຮັບສະມາຊິກ, ເລື່ອນສະມາຊິກເຍົາວະຊົນທັນວາເປັນສະມາຊິກຊາວໜຸ່ມປະຊາຊົນປະຕິວັດລາວ, ການເດີນແບບແຜນ, ການຕີກອງດຸລິຍາງ, ການຕັ້ງຄ້າຍ ກິດຈະກຳຊຸມນຸມໄຟ ແລະ ອື່ນໆ.ນີ້ກໍ່ເພື່ອເປັນການສ້າງໃຫ້ນັກຮຽນນັກສຶກສາໄດ້ຮັບຮູ້ ແລະ ເຂົ້າໃຈຕໍ່ກັບວຽກງານເຍົາວະຊົນທັນວາ ເພື່ອຈະນຳໄປພັດທະນາເດັກນ້ອຍເຍົາວະຊົນໃນຕົວເມືອງ ແລະ ເຂດຫ່າງໄກສອກຫຼີກໃຫ້ມີຄວາມກ້າວໜ້າ ມີຄວາມຮູ້ຄວາມສາມາດ ແລະເປັນຜູ້ສືບທອດທີ່ດີໃນອານາຄົດ. ໃນການເປີດຝຶກອົບຮົມໃນຄັ້ງນີ້ແມ່ນຈະໄດ້ດຳເນີນເປັນເວລາ 3 ວັນຈິ່ງຈະສຳເລັດ.

ຂ່າວ​ສານ​ໂດຍ: ປະ​ນົມ​ພອນ ຄອນ​ສະ​ຫວັດ