ກອງປະຊຸມຕິດຕາມການປະກັນ ຄຸນນະພາບການສຶກສາ ພາຍໃນ ວິທະຍາໄລຄູຫຼວງພະບາງ ສົກປີ 2017-2018 (QualityAssurance in Luangprabang Teacher Trianing College 2017-2018)

ກອງ​ປະ​ຊຸມ​ການ​ປະ​ກັນ​ຄຸນ​ນະ​ພາບ​ພາຍ​ນອກ ​ຂອງ​ວິ​ທະ​ຍາ​ໄລ​ຄູຫຼວງ​ພະ​ບາງ ສົກ​ປີ 2017-2018 ໄດ້​ໄຂ​ຂື້ນ​ໃນ​ວັນ​ທີ 22-23 ຕຸ​ລາ 2018 ທີ່​ຫ້ອງ​ປະ​ຊຸມ​ຂອງວິ​ທະ​ຍາ​ໄລ​ຄູຫຼວງ​ພະ​ບາງ, ໂດຍ​ການ​ເປັນ​ປະ​ທານ​ຂອງ​ທ່ານ ພູ​ວຽງ ວົງ​ພະ​ຈັນ ​ຮອງ​ຫົວ​ໜ້າ​ພະ​ແນກ​ປະ​ເມີນ​ຜົນ​ກົມ​ສ້າງ​ຄູ, ທ່ານ ບຸນ​ສຸ​ວັນ ລັດ​ຕະ​ນາ ຜູ້​ອຳ​ນວຍ​ການ​ວິ​ທະ​ຍາ​ໄລ​ຄູຫຼວງ​ພະ​ບາງ , ທ່ານ ​ບຸນ​ປັນ ໄຊ​ຍະ​ສິນ ວິ​ຊາ​ການ​ພະ​ແນກ​ປະ​ເມີນ​ຜົນ​ກົມ​ສ້າງ​ຄູ,  ມີຄະນະຄູ-ອາຈານຈາກວິທະຍາໄລຄູຫຼວງ​ພະ​ບາງ​ ທີ່ຮັບຜິດຊອບວຽກງານປະກັນຄຸນນະພາບຈາກ 10 ຫ້ອງຢູ່ທີ່ວິທະຍາໄລຄູຫຼວງພະບາງເຂົ້າຮ່ວມທັງ​ໝົດ 19 ທ່ານ, ຍິງ 5 ທ່ານ.

ໃນກອງປະຊຸມດັ່ງກ່າວທ່ານ ບຸນສຸວັນ ລັດຕະນາ ຜູ້ອຳນວຍການ ຜູ້​ອຳ​ນວຍ​ການ​ວິ​ທະ​ຍາ​ໄລ​ຄູຫຼວງ​ພະ​ບາງ ໄດ້ກ່າວເປີດກອງປະຊຸມກ່ຽວກັບຄວາມພ້ອມການຮັບຜິດຊອບວຽກງານປະກັນຄຸນນະພາບ ແລະ ຂໍ້ມູນຕ່າງໆທີ່ເປັນຫຼັກຖານອ້າງອີງຕາມຕົວຊີ້ວັດ 10 ມາດຖານ 50 ຕົວ​ຊີ້​ວັດ, ພ້ອມນີ້້ທ່ານ ພູ​ວຽງ ວົງ​ພະ​ຈັນ ​ຮອງ​ຫົວ​ໜ້າ​ພະ​ແນກ​ປະ​ເມີນ​ຜົນ​ກົມ​ສ້າງ​ຄູ ກໍ່ໄດ້ກ່າວຕໍ່ກອງປະຊຸມເພື່ອແນະນຳ ແລະ ​ໃຫ້​ທິດ​ທາງ​ການ​ປະ​ຕິ​ບັດ​ຈັດ​ຕັ້ງ​ໃຫ້​ຖືກ​ຕ້ອງ​ຕາມຂັ້ນຕອນ , ຮູບ​ແບບການຈັດຕັ້ງ ແລະ ກໍ່ໄດ້ໃຫ້ຄຳຄິດຄຳເຫັນໃຫ້ທິດຊີ້ນຳຫລາຍບັນຫາທີ່ສຳຄັນ ແລະ  ໂອ້ລົມຕໍ່ກອງປະຊຸມໂດຍຮຽກຮ້ອງໃຫ້ແຕ່ລະພາກສ່ວນທີ່ເຂົ້າຮ່ວມຈົ່ງເປັນເຈົ້າການ ແລະ ກະກຽມຄວາມພ້ອມໃນທຸກດ້ານ ເຊີ່ງວ່າ​ທ່ານ​ໄດ້​ເນັ້ນ​ໃສ່​ການກວດ​ຄືນ​ວຽກ​ທີ່​ຍັງ​ຄ້າງ​ຄາ​ຂອງ​ການ​ປະ​ກັນ​ຄຸນ​ນະ​ພາບ​ພາຍນອກ ເພື່ອ​ໃຫ້​ວິ​ທະ​ຍາ​ໄລ​ຄູຫຼວງ​ພະ​ບາງ​ກ້າວ​ໄປ​ສູ່​ຄວາມ​ເປັນ​ເລີດ ທັ່ງ​ນີ້ເພື່ອແນ່ໃສ່ເຮັດໃຫ້ກອງປະຊຸມການ​ປະ​ກັນ​ຄຸນ​ນະ​ພາບ​ພາຍ​ນອກ ແລະ ການປະຕິບັດວຽກງານການຮຽນ-ການສອນໃຫ້ໄດ້ຮັບຜົນສຳເລັດຢ່າງຈົບງາມ.

​ຫຼັງ​ຈາກນັ້ນ​ຄະ​ນະ​ປະ​ເມີນ​ພາຍນອກ​ກໍ​ໄດ້​ກວດ​ກາ​ແຟ້ມ​ທີ່​ເປັນຫຼັກ​ຖານ, ແນະ​ນຳ​ຂັ້ນ​ຕອນ​ການ​ເກັບຫຼັກ​ຖານ​ໃຫ້​ຖືກ​ກັບ​ແຕ່​ລະ​ຕົວ​ຊີ້​ວັດ, ​ ຈາກນັ້ນກໍ​ໄດ້​ດຳ​ເນີນ​ການ​ສຳ​ພາດ​ຂໍ້​ມູນ​ຂອງ​ແຕ່​ລະ​ມາດ​ຖານ ຈາກ​ມາດ​ຖານ​ທີ01 ຫາ ມາດ​ຖານ​ທີ 10 ທີ່​ມີ​ຈຳ​ນວນ 50 ຕົວ​ຊີ້​ວັດ, ເຊີ່ງ​ເວ​ລາ​ໃນ​ການ​ປະ​ເມີນ​ຈະ​ດຳ​ເນີນ​ໄປ​ເປັນ​ເວ​ລາ 2 ວັນ​ຈຶ່ງ​ຈະ​ສຳ​ເລັດ​ການ​ປະ​ເມີນ​ຄຸນ​ນະ​ພາບ​ພາຍນອກ​ໃນ​ຄັ້ງ​ນີ້.

ຂ່າວ​ໂດຍ: ຜູ້​ຊ່ວຍ​ອາ​ຈານ ປ.ຕີ ປະ​ນົມ​ພອນ ຄອນ​ສະ​ຫວັດ

ໜ່ວຍ​ງານ​ຂໍ້​ມູນ​ຂ່າວ​ສານ